Ilbieraħ tħabbar uffiċjalment li Keith Perry mhux se jibqa’ jokkupa l-kariga ta’ President ta’ Sliema Wanderers. Din id-deċiżjoni ġiet ikkonfermata wara laqgħa interna tal-amministrazzjoni tal-klabb, fejn ġew diskussi l-pjanijiet futuri u l-bidliet meħtieġa fit-tmexxija.
Keith Perry kien ilu jmexxi lil Sliema Wanderers għal numru ta’ snin, fejn matul iż-żmien tiegħu l-klabb għadda minn diversi sfidi u mumenti importanti. Taħt it-tmexxija tiegħu, saru diversi inizjattivi biex jissaħħaħ l-istruttura tal-klabb kemm fuq livell sportiv kif ukoll amministrattiv kif ukoll intrebħu numru ta’ unuri.
Skont sorsi viċin il-klabb, id-deċiżjoni li Perry ma jibqax President hija parti minn strateġija ġdida li għandha l-għan li ġġib direzzjoni friska u ideat ġodda biex il-klabb jerġa’ jikseb suċċess fil-kompetizzjonijiet lokali.
F’intervista fuq il-paġna soċjali ta’ Sliema Wanderers, Keith Perry rringrazzja lill-partitarji, lill-membri tal-kumitat u lill-plejers għall-appoġġ tagħhom tul il-perjodu tiegħu bħala President. Huwa esprima wkoll il-fiduċja tiegħu li l-klabb se jkompli javvanza u jikseb riżultati pożittivi fil-futur.
S’issa għadu mhux magħruf min se jieħu post Perry fil-kariga ta’ President, iżda huwa mistenni li fil-jiem li ġejjin il-klabb iħabbar aktar dettalji dwar it-tmexxija l-ġdida.
