Kif għażilt l-atletika fost minjiera ta’ sports ieħor?
Nista’ ngħid li l-atletika għażlet lili u mhux jien għażilt l-atletika.
Minn dejjem kienet l-hena tiegħi li noqgħod intellaq kontra sħabi fil-breaks tal-iskola primarja.
Ħadd mill-bniet ma kien ikun irid jikkompetili miegħi għax dejjem kont nirbaħ u għalhekk kont nispiċċa nikkompeti kontra s-subien.
Kont nisma’ ħafna kummenti wkoll, li jien suppost għandi noqgħod bilqiegħda nitkellem u nilgħab mal-bniet l-oħra għaliex il- ġiri huwa sport tas-subien biss.
Ta’ kemm bdejt tipprattikka l-atletika?
Bdejt nipprattika l-atletika ta’ tmien snin meta kont fir-raba’ sena tal-Primarja.
X’ħeġġek l-iktar biex tibda tipprattika dan l-isport?
L-għalliema tal-edukazzjoni fiżika kienet l-unika persuna li dejjem immotivatni fl-iskola u kienet tagħżilni biex nirrapreżenta l-iskola primarja ta’ Birżebbuġa fil-cross countries li kienu jsiru kull sena.
It-tliet darbiet li ħadt sehem fihom, ġejt l-ewwel mill-iskejjel kollha ta’ Malta.
L-istess għalliema kif rat hekk bagħtet għall-ġenituri tiegħi u qaltilhom li tħossha li tkun qed tonqos hekk ma tinfurmahomx bil-potenzjal tiegħi.
Hi tathom id-dettalji ta’ club u coach biex inkun nista’ nittrenja wara l-ħin tal-iskola. Il-ġenituri tiegħi milll-ewwel ikkuntattjaw lill-coach u bdejt nittrenja dik il-ġimgħa stess.
Min kien dak il-persuna li ispirak biex tagħżel l-atletika?
Bla dubju, li kieku ma kinitx din l-għalliema li nfurmat lill-ġenituri tiegħi, huma qatt ma kienu jkunu jafu bil-potenzjal tiegħi, u b’hekk jien qatt ma kont nibda nittrenja wara l-ħin tal-iskola.
Ma rridx ninsa wkoll l-ewwel coach li kelli. Kienet mara dedikata ħafna u bis-saħħa tagħha bdejt nieħu l-affarijiet iktar bis- serjetá. Aktar u aktar meta bdejt nara titjib u bdejt innaqqas il-ħinijiet personali tiegħi f’kull kompetizzjoni.
Kienet possibli li nerġa’ nkompli minn fejn ħallejt sentejn ilu bis-saħħa tas- sapport li għandi mingħand il-coach preżenti, Rachid Chouhal.
Liema unuri prinċipali irnexxielek tikseb fil-karriera tiegħek?
Irrapreżentajt lil Malta tliet darbiet fil-European Kids Athletic Games, fejn fl-2013 irbaht midalja tad- deheb fit-tigrija tat-300m.
Irraprezentajt lil Malta darbtejn fil-FISEC Games, fejn fl-2015 irbaħt midalja tad-deheb fit-tiġrija tal-400m u midalja tal-bronż fil-4x100m Relay.
Fl-2016 kelli l-opportunitá li nirrapreżenta lil Malta f’Georgia, fil-European Youth Championships u ġewwa s-Samoa Islands fil-Youth Commonwealth Games fejn wasalt sas-semi-finali tat-tellieqa tal-200m.
Fl-2016 kont l-iżgħar atleta li kkwalifikajt għall- kompetizzjoni taċ-Championships of Small States li saru f’Malta fejn ġrejt l- 400m u s-Swedish Relay.
Fl-2012, fl-2014, u fl-2016 kont magħżula bħala l-Atleta tas-Sena fil-kateogriji rispettivi u fl-2017 kont waħda mil-finalisti tal-IsportMalta Awards – Għażliet Sportivi Nazzjonali.
Liema kien l-aħjar ħin tiegħek s’issa?
L-aħjar ħinijiet tiegħi jmorru lura għall-2016 – 57.9s fil-400m u 25.54s fil-200m. Dan għaliex fis-sena 2018 kelli nieħu break mill-atletika u nsiefer barra minn Malta bħala parti mill-kors fil-karriera tiegħi.
Kemm temmen li l-media tagħtikom biżżejjed pubbliċità u exposure jew dan isir waqt kompetizzjonijiet importanti bħal ma huma l-Logħob tal-Pajjiżi ż- Żgħar?
Fl-opinjoni tiegħi meta tikkumpara l-ammont ta’ aħbarijiet fuq il-football ta’ kuljum, żgur li ma tagħtix biżżejjed pubbliċitá lill-atletika.
Dan għalkemm dan l-aħħar qed ikun hemm titjib kbir, speċjalment meta jintrebħu l-midalji jew jinkisru xi rekords.
Għandek xi ħolma li tixtieq tikseb fl-atletika?
Wara sentejn wieqfa mill-atletika għax kont qed ngħix barra minn Malta, biex ikolli x-xogħol li dejjem xtaqt, issa li rritornajt għat-taħriġ b’saħħti, ninsab ferħana ħafna.
Nixtieq ukoll li bil-mod il-mod nerġa’ nibda nersaq lejn il-ħinijiet li kelli qabel u nerġa’ nkun parti mit-team nazzjonali.
X’sagrifiċċji u impenji oħra jitlob l-isport li int tipprattika?
Bħal kull sport ieħor, l-atletika tirrikjedi ħafna ħin ta’ taħriġ. Jien naħdem kif ukoll nittrenja mit- Tnejn sal-Ġimgha. Xi drabi s-Sibt nittrenja wkoll kemm-il darba ma tkunx il-ġurnata tal-kompetizzjoni fit-trakka tal-Marsa.
It-time management fil-ħajja tiegħi huwa importanti ħafna biex jirnexxieli nlaħħaq ma’ kollox.
Il-familja tiegħi kif ukoll il-coach, Rachid Chouhal jissapportjawni ħafni biex dan ikun possibbli. Biex tittrenja kważi l-ġimgħa kollha, trid toqgħod lura minn ħafna affarijiet bħall-ħruġ u divertiment u għalhekk xi drabi tkun trid tagħmel ħafna sagrifiċċji biex timxi ‘l quddiem. Peró, minn ta’ etá żgħira, l-isport kien dejjem ta’ prijoritá f’ħajti.
Għalkemm l-atleti li tikkompeti magħhom huma wkoll ħbieb tiegħek, ninsab persważ li jidħol ukoll ċertu sens ta’ kompetizzjoni fejn wieħed ikun irid jikseb ħin aħjar mill-ieħor. X’inhuma l-kummenti tiegħek?
Huwa sabiħ immens meta jkollok ħbieb atleti għaliex nifhmu ħafna lil xulxin speċjalment is-sagrifiċċji li ngħaddu minnhom.
Xi drabi jkun hemm żmien meta anke nittrenjaw flimkien u ngħinu lil xulxin.
Peró, imbagħad bis-saħħa tal-kompetizzjoni, saħansitra ma’ sħabek stess jirnexxielek tikseb ħinijiet aħjar.
X’kompetizzjonijiet prinċipali se tieħu sehem fihom fil-futur qrib?
S’issa f’moħħi għandi biss li nġib lura l-eperjenza u nieħu pjaċir u nitgħallem waqt il-kompetizzjonijiet u għalhekk se nipprova nieħu sehem f’kull kompetizzjoni lokali li se jkun hawn.
Tista’ tgħaddi messaġġ lil dawk it-tfal u żgħażagħ li qegħdin jaħsbuha bis- serjetà li jibdew jipprattikaw l-atletika?
Jien nemmen li l-atletika mhijiex biss sport fejn tiġri, taqbeż, jew titfa’ t-throws.
L-atletika tgħallmek ħafna valuri bħal dixxiplina, impenn, reżiljenza u rispett lejk innifsek u lejn ħaddiehor.
Barra minn hekk titgħallem ħafna kif tqassam ix-xoghol biex tlaħħaq ma’ kollox għax tkun trid issib il-ħin.
Mill-esperjenza tiegħi, jien għamilt 10 snin sħaħ nattendi dejjem regolari u qatt ma naf li waqaft għal xi perjodu speċjalment meta kont għaddejja bl- eżamijiet għax kont naf inqassam il-ħin sewwa, u nirsisti fl-istudju biex inkun nista’ nittrenja.
Inħeġġeġ lil kulħadd li qatt m’hu tard wisq biex tibda tipprattika l-atletika, u ladarba tibda … ma tkun trid tieqaf qatt … għax jimlik b’sodisfazzjon kbir!