Bejn illum u għada tintlagħab il-ħames ġurnata tal-Fażi tal-Gruppi tal- UEFA Champions League fejn mistennija jikkwalifikaw aktar timijiet għall-Aħħar 16 biex jingħaqdu ma’ Real Madrid, Bayern Munich, Inter, Real Sociedad, Manchester City u Leipzig.
Iżda mingħajr l-ebda dubju l-aqwa partita ta’ dan il-programm hija dik bejn Galatasaray u Manchester United, li se tintlagħab għada.
Filwaqt li t-team Tork jinsab fit-tielet post, il-United jinsabu fl-aħħar post ta’ Grupp A u meta jkun fadal partita waħda biss, telfa għaż-żewġ timijiet tkun tfisser l-eliminazzjoni.
Fl-istess grupp hemm FC Copenhagen li jinsabu fit-tielet post bl-istess ammont ta’ punt u jridu jmorru jilagħbu għand Bayern Munich.
Ir-Red Devils jinżlu għal dan il-konfront b’moral għoli hekk kif ġejjin minn rebħa ta’ 3-0 għand Everton.
L-uniku player assenti għal Gala huwa Abdulkarim Bardacki filwaqt li l-coach, Erik ten Hag, se jkollu jgħaddi mingħajr is-servizzi ta’ Casemiro, Jonny Evans, Christian Eriksen u Rasmus Hojlund … kollha imweġġgħin.
Milan, li jinsabu fit-tielet post ta’ Grupp F, jospitaw lil Borussia Dortmund fejn xejn għajr minn rebħa ma tissodisfa l-kriterji tagħhom hekk kif jinsabu distakkati b’żewġ punti minn Borussia li jinsabu fil-quċċata.
Nhar is-Sibt li għadda, ir-Rossoneri kisbu rebħa ta’ 1-0 fuq Fiorentina biex jinżlu għal din il-partita b’moral għoli.
Iżda anke Borussia ġejjin minn rebħa ta’ 4-2 fuq Borussia Moenchengladbach u għalhekk għandu jkun konfront mill-aktar interessanti.
Fil-partita preċedenti il- partita spiċċat fi draw ta’ bla goals.
Oliver Giroud se jirritorna għal Milan minn sospensjoni iżda se jkollhom neqsin lil Rafael Leao, Mattia Caldara, Marco Pellegrino, Marco Sportiello, Pierre Kalulu u Noah Okafor minħabba injuries.
Paris St Germain jilqgħu lil Newcastle b’dawn tal-aħħar jinqalgħu jekk joħorġu telliefa.
Min-naħa tal-Pariġini, jikkwalifikaw jekk huma jirbħu u Milan jonqsu milli jagħmlu dan.
Iżda huma għandhom bosta players neqsin, fosthom Keylor Navas, Nuno Mendes, Warren Zaire-Emery, Marquinhos u Sergio Rico.
Il-Magpies se jkollhom jilagħbu mingħajr l-imweġġgħin, Joe Willock, Callum Wilson, Harvey Barnes, Matt Targett, Elliot Anderson, Jacob Murphy, Dan Burn u Sven Botman.
Fi Grupp B, punt ikun biżżejjed għal Arsenal meta jospitaw lil RC Lens.
Il-leaders tal-Premier League m’għandhomx ifallu, tant, li l-coach, Mikel Arteta, mistenni jagħmel rotazzjoni tal-players.
Fi Grupp H, Barcelona jkunu nvoluti f’partita diffiċli kontra Porto u għandhom bżonn rebħa biex jaċċertaw posthom mal-Aħħar 16 … wara li fl-aħħar ħarġa tagħhom huma sfaw megħluba minn Shakhtar Donetsk (1-0) li wkoll daħlu biċ-ċans.
