F’La Liga Real Madrid ħarġu minn Mestalla bi tliet punti importanti wara li għelbu lil Valencia 3-0 f’partita li fiha wrew il-kwalità u s-saħħa tagħhom, partikolarment fl-ewwel taqsima.
Federico Valverde poġġa lil Real Madrid fil-vantaġġ fit-28 minuta, filwaqt li Arda Guler irdoppja l-iskor tmien minuti wara biex it-team ta’ Madrid daħal jistrieħ b’vantaġġ komdu ta’ żewġ gowls.
Valencia ppruvaw jagħmlu reazzjoni biex jidħlu fil-partita wara l-mistrieħ, iżda sabu quddiemhom difiża organizzata tajjeb.
Kylian Mbappé temm kull tama ta’ rimonta meta fit-75 minuta skorja t-tielet goal ta’ Real Madrid wara azzjoni maħduma tajjeb minn Arda Guler.
Is-sitwazzjoni għal Valencia kompliet tikkumplika ruħha meta Jose Gaya (79) tkeċċa wara foul fuq Mbappé.
B’din ir-rebħa, Real Madrid laħqu lil Barcelona fil-quċċata iżda lagħbu partita aktar.
