Saru magħrufa l-finalisti tat-tliet kompetizzjonijiet ewlenin organizzati mill-Malta Blackball Pool Federation wara s-semifinali li ntlagħbu l-ġimgħa li għaddiet.
Cospicua Rangers A kisbu posthom fil-finali tan-National KO wara li għelbu lil Birkirkara Youngsters bl-iskor ta’ 21-15. Dan kollu seħħ wara li kienu temmew l-ewwel parti tal-konfront 14-7 minn taħt.
Il-Bormliżi se jiltaqgħu kontra Ħamrun 147 A li min-naħa tagħhom għelbu lil Żebbuġ St Joseph A (De Rohan) bl-iskor ta’ 21-8, wara vantaġġ ta’ 13-7 fl-ewwel parti.
Fir-Regional KO, Cospicua Rangers B għaddew għall-finali wara rebħa ta’ 21-9 kontra PI Floriana, wara li kienu fetħu vantaġġ ta’ 14-6.
Cospicua Rangers B jaffaċċjaw lil Birkirkara Boċċi fil-finali. Il-Karkariżi għelbu lil Siġġiewi Montekristo A bl-iskor ta’ 21-13, wara li l-ewwel parti kienet intemmet 12-8 favur il-Karkariżi.
Fgura Plan B Bar kisbu l-kwalifikazzjoni għall-finali tal-Community KO wara rebħa ta’ 21-11 kontra Qormi San Bastjan Boċċi, filwaqt li Ħamrun 147 D għelbu lil Mrieħel Billiard House B bl-iskor ta’ 21-15.
B’hekk, Fgura Plan B Bar u Ħamrun 147 D se jiltaqgħu fil-finali tal-Community Knockout nhar it-Tnejn li ġej, fis-7.30pm, fil-Juventus Club f’Birkirkara.
