Minn Cristian Muscat
Bejn illum u għada tissokta r-raba’ ġurnata tal-Malta Premier League wara li nhar l-Erbgħa li għadda, Floriana u Valletta ħarġu rebbieħa meta għelbu lil Gzira United (4-1) u lil Hibernians (2-0) rispettivament.
Sliema W. v Birkirkara – Bla dubju, din il-partita hija l-aqwa konfront ta’ tmiem il-ġimgħa bejn żewġ timijiet li f’dan il-Millenju qed jitqiesu bħala żewġ ġganti tal-football domestiku.
Il-pressjoni tinsab kollha fuq Sliema Wanderers minħabba li ma jaffordjawx iwaqqgħu aktar punti jekk iridu jżommu l-kuntatt mat-timijiet ta’ fuq.
Huma ġejjin minn rebħa fuq Birżebbuġa St Peter’s (2-1) wara żewġ telfiet identiċi ta’ 2-0 kontra Hibernians u Floriana.
Min-naħa ta’ Birkirkara, ir-rekord tagħhom huma kontra dak ta’ Sliema meta wara żewġ rebħiet, kontra Gzira United (4-0) u Hamrun Spartans (1-0), huma sfaw megħluba minn Mosta bl-iskor ta’ 1-0.
Jekk il-Karkariżi jirbħu, jiftħu vantaġġ ta’ sitt punti iżda jekk il-Wanderers jirbħu … jilħqu lill-istess Stripes.
Balzan v Birżebbuġa SP – Balzan jaffrontaw lil Birżebbuġa St Peter’s b’dawn tal-aħħar jimmiraw li jiktbu l-istorja billi jiksbu l-ewwel punt fl-ogħla diviżjoni.
Huma jinsabu fil-qiegħ tal-klassifika, bla punt, flimkien ma’ Gzira United.
Rebħa għal Balzan tpoġġihom seba’ punti fuq iż- żona l-ħamra iżda rebħa għal Birżebbuġa tiftaħ it-taqtiegħa għas-salvazzjoni.
Marsaxlokk v Mosta – Dan għandu jkun konfront mill-aktar interessanti … bejn żewġ timijiet li, flimkien ma’ Floriana, għadhom ma ġewx megħluba.
Filwaqt li Mosta huma l-uniku team li għandu punti massimi minn tliet partiti, ix-Xlukkajri fallew żewġ punti fid-draw ta’ 1-1 kontra Balzan.
Iżda mbagħad huma għelbu lil Hibernians (1-0) u lil Valletta (2-1) rispettivament.
Bħalissa, Mosta huma l-aktar team konsistenti u bħal donnu qabad ritmu tajjeb għal kuntrarju tal-istaġun li għadda minħabba li kien fix-xifer li jiġi relegat.
Peró, f’dan l-istaġun il- Mostin huma team trasformat.
Zabbar SP v Hamrun S. – Din hija partita delikata għal Hamrun Spartans fi staġun li fih kellhom bidu mill-aktar diżappuntanti hekk kif minn tliet partiti kisbu punt wieħed biss fid-draw ta’ 1-1 kontra Floriana wara ż-żewġ telfiet kontra Mosta (2-0) u Birkirkara (1-0).
Zabbar St Patrick għandhom erba’ punti u filwaqt li jimmiraw għal pożizzjoni aktar komda fil-klassifika, ikomplu jkabbru l-problemi lill-istess Spartans li f’dan l-istaġun huma biss id-dell ta’ dawn l-aħħar snin bir- rebħ ta’ bosta unuri.
