Il-mara li għall-ħabta tas-1.00pm sabet ruħha f’diffikultajiet waqt li kienet qiegħda tgħum f’Kemmuna flimkien ma’ sħabha tinsab fil-periklu li titlef ħajjitha.
Il-mara għandha 32 sena u hija ta’ nazzjonalità Ċiniża ngħatat l-għajnuna mill-membri tal-ERRC fejn anke tawha CPR f’Kemmuna stess. Sorsi qalu lil dan is-sit li t-tfajla belgħet ħafna ilma sakemm il-membri tal-ERRC waslu fil-post fejn kienet tinsab.
Hija ttieħded lejn il-Port tal-Imġarr permezz ta’ dgħajsa tal-istess ERRC fejn sabet tim mediku b’ambulanza li ħadha l-Isptar Ġenerali t’Għawdex.
Dwar dan il-każ ġiet informata wkoll il-pulizija li mill-ewwel bdew bl-investigazzjonijiet tagħhom.
Il-Maġistrat tal-Għassa Dr Simone Grech LL.D ġiet infurmat bil-każ u ħatret inkjesta.
Aktar kmieni: Tfajla ssib ruħha f’diffikultajiet waqt kienet qed tgħum f’Kemmuna
Tfajla li l-identità tagħha s’issa għadha mhix magħrufa sabet ruħha f’diffikutajiet waqt li għall-ħabta tas-1.00pm kienet qiegħda tgħum ma’ sħabha f’Kemmuna.
Mill-ewwel inġibdet l-attenzjoni tal-lifeguard tal-ERRC li jinsabu Kemmuna fejn dawn qabżu għaliha u tellewha l-art. Sorsi qalu lil dan is-sit li t-tfajla kienet kważi għerqet.
Tim mediku mill-Isptar Ġenerali t’Għawdex marru fil-port tal-Imġarr biex hekk kif it-tfajla titwassal minn Kemmuna jkunu jistgħu jagħtuha l-ewwel għajnuna.
Il-kundizzjoni tagħha s’issa għadha mhix magħrufa.
