Minn Cristian Muscat
Illum hija l-aktar ġurnata importanti tal-BOV Kampjonat Premier ta’ dan l-istaġun meta f’konfront mill-aktar kruċjali, il-leaders Hamrun Spartans jaffrontaw lil Floriana li jinsabu fit-tieni post, b’punt warajhom.
Rebħa għall-Ħamruniżi tkun tfisser l-għaxar titlu fl-istorja tal-club iżda rebħa għal Floriana jew riżultat ta’ draw jkunu jfissru li kollox irid jiġi deċiż fl-aħħar ġurnata.
L-attenzjoni tkun mixħuta wkoll fin-naħa t’isfel tal-klassifika li se tibqa’ inċerta sal-aħħar.
Naxxar Lions, li huma prattikament salvi, jilagħbu kontra Valletta li jridu jirbħu ż-żewġ partiti li fadlilhom.
Balzan jiltaqgħu kontra Mosta hekk kif jimmiraw għal rebħa minħabba li jistgħu jintlaħqu minn Valletta.
Sta Lucia jiffaċċjaw lil Gzira United li bi draw jaċċertaw is-salvazzjoni u jħallu lil Luċjani f’periklu serju.
Mill-bqija, it-tliet partiti l-oħra huma biss formalitá hekk kif Sliema Wanderers u Birkirkara jilagħbu kontra ż-żewġ timijiet diġá relegati, Gudja United u Sirens … filwaqt li Marsaxlokk, li prattikament huma assigurati mir-raba’ post jiltaqgħu kontra Hibernians.
Floriana v Hamrun S. – Fl-aqwa partita ta’ dan l-istaġun li hija meqjusa finali għar-rebħ tat-titlu, Hamrun Spartans jibdew favoriti li jiksbu t-tliet punti … biex jibdew il-mixja trijonfali lejn Strada Rjali fejn hemmhekk jintlaħaq il-qofol taċ-ċelebrazzjonijiet.
Peró, Floriana jippossjiedu team qawwi li kapaċi jqum għall-okkażjoni.
Wieħed ma jridx jinsa li fl-ewwel round l-Ispartans kienu ħarġu rebbieħa b’goal waħdani skorja fl-94 minuta wara żball tal-goalkeeper Furjaniż, Georgi Kitanov, li inċidentalment illum se jkun l-uniku player sospiż minn dan il-konfront wara li, fit-telfa ta’ 1-0 kontra Marsaxlokk, huwa dabbar karta safra inutli proprju lejn it-tmiem biex kienet ir-raba’ waħda tiegħu tal-istaġun.
Filwaqt li Hamrun ġejjin minn rebħa komda ta’ 4-1 fuq Sta Lucia, il-Greens ġejjin minn telfa ta’ 1-0 kontra Marsaxlokk.
Fil-veritá huma kienu kkundizzjonati minħabba li kellhom xejn inqas minn disa’ players, inkluż Kitanov, li kienu qed iġorru magħhom it-tielet karta safra u għaldaqsant kienu kawti fid-daħliet tagħhom biex ma jiġux ammoniti.
Min-naħa l-oħra, il-Ħamruniżi se jkunu msaħħa bir-ritorn minn sospensjoni ta’ Emerson Marcelina u Roko Prsa.
Wieħed jawgura li jkun x’ikun l-eżitu tagħha, jirrenja l-ispirtu sportiv.
Naxxar L. v Valletta – Valletta jilagħbu kontra Naxxar Lions, li huma prattikament salvi, u xejn għajr minn rebħa ma tissodisfa l-kriterji tal-Beltin.
Miż-żewġ logħbiet li fadal, Valletta jridu jiksbu punti massimi biex jibqgħu jittamaw għas-salvazzjoni fejn jistennew ukoll ir-riżultat ta’ timijiet oħra minħabba li ma jiddependix minnhom biss.
Huma jkollhom lil Juan Bolanos Ramires lura minn sospensjoni filwaqt li Naxxar għandhom lil Ryan Gilmour sospiż.
Fl-ewwel round Valletta ħarġu rebbieħa 2-1.
Balzan v Mosta – Wara t-telfa ta’ 1-0 kontra Valletta, Balzan jaffrontaw lil Mosta f’konfront kruċjali.
Ħadd minnhom ma jaffordja jwaqqa’ l-punti minħabba li Sta Lucia u Valletta jinsabu warajhom, lesti japprofittaw minn xi żelqa.
Iż-żewġ timijiet għandhom player sospiż – Andre Prates għal Balzan u Precious Linus Tenebe għal Mosta.
Peró jirritornaw għalihom Ryohei Michibuchi u Bradley Farrugia minn sospensjoni.
Fl-ewwel round Balzan kienu għelbu lil Mosta 2-0.
Sta Lucia v Gzira U.– Dan huwa konfront dirett ieħor tan-naħa t’isfel tal-klassifika.
Gzira United iridu punt wieħed biss biex jiġu dikjarati salvi minħabba li ma jkunux jistgħu jintlaħqu mill-istess Sta Lucia u Valletta.
Iżda jekk il-Luċjani joħorġu rebbieħa, is-sitwazzjoni tar-relegazzjoni tkompli tikkomplika ruħha.
Kull team għandu player sospiż – Thiago Espindola għal Gzira u Nicolas Virano Gonzalo għal Sta Lucia, li iżda, ikollhom lura lil Abraham Temitope Ojo lura minn sospensjoni.
Fl-ewwel round, il-Maroons għelbu lil-Luċjani 2-1.
Hibernians v Marsaxlokk – F’partita oħra diretta għar-raba’ post, Hibernians jikkonfrontaw lil Marsaxlokk li punt ikun biżżejjed għalihom biex jissiġillaw posthom filwaqt li jittamaw li Floriana jew Sliema Wanderers jirbħu l-FA Trophy li tkun tfisser post fil-UEFA Conference League.
Huma ma jistgħux jinkludu lil Sunday Akinbule iżda jirritorna Samuel Cassar filwaqt li l-Pawlisti għandhom lil Robert Bairam sospiż.
Fl-ewwel round iż-żewġ timijiet temmew 1-1.
Gudja U. v Sliema W. – F’partita bla storja, Sliema Wanderers jilagħbu kontra t-team diġá relegat, Gudja United, li għadu qed ifittex l-ewwel rebħa.
Il-Gudjani se jkollhom jgħaddu mingħajr is-sospiżi Matias Muchardi u Mirko Esposito … filwaqt li għall- Wanderers jirritorna Gustavo Alcino.
Fl-ewwel round, Sliema kienu rebħu 2-0.
Birkirkara v Sirens – Dan il-konfront huwa biss formalitá hekk kif Sirens huma diġá relegati filwaqt li Birkirkara, li rebħu l-logħba tal-ewwel round 2-1, m’għandhomx ċans għar-raba’ post.
