Minn Cristian Muscat
Victoria Hotspurs FC ħabbru l-akkwist ta’ Andreas Vella.
F’età ta’ 25 sena, Andreas diġà jġib miegħu esperjenza kbira. Huwa m’għandu bżonn l-ebda introduzzjoni, wara li rrappreżenta lil Malta bi kburija fil-livelli internazzjonali ta’ taħt is-17-il sena, id-19-il sena, u l-21 sena.
L-istaġun li għadda, Andreas lagħab ma’ Tarxien Rainbows fil-Malta Premier League, fejn kien player ewlieni u deher fi kważi kull logħba tal-Kampjonat, fejn wera l-konsistenza, il-kwalità, u d-determinazzjoni tiegħu.
Fi stqarrija, il-Hotspurs, qalu li bħala difensur xellugi talentuż u ambizzjuż, jemmnu li Andreas se jkun akkwist mill-aqwa fl-iskwadra hekk kif qed ikomplu jibnu għall-istaġun li ġej.
Dan filwaqt li tennew li qed jistennew bil-ħerqa li jaraw lil Andreas jilbes il-flokk ta’ Victoria Hotspurs.
Intant, dan is-sit tkellem ma’ Andrea nnifsu fejn talbu jagħtina iktar dettalji rigward kif qed iħares lejn din l-esperjenza ġdida fil-karriera tiegħu mal-Hotspurs, kif ukoll xi kummenti rigward l-esperjenza issa passata tiegħu ma’ Tarxien Rainbows.
Fi kliemu:
“Ninsab kuntent ħafna li se nkun qed nibda dan il-kapitlu ġdid ma’ Victoria Hotspurs FC u eċċitat għall-istaġun li ġej. Huwa privileġġ li nirrappreżenta klabb bi storja daqshekk rikka. Jien impenjat bis-sħiħ li nagħti kollox u li ngħin lit-tim jilħaq l-għanijiet tiegħu. Flimkien ma’ sħabi tat-tim, il-coaching staff, u l-partitarji tagħna, ninsab fiduċjuż li nistgħu nibnu xi ħaġa speċjali. Forza Hotspurs!”
“Hekk kif qed nagħlaq dan il-kapitlu ma’ Tarxien Rainbows, inħares lura lejn vjaġġ mimli kemm b’mumenti tajbin kif ukoll ħżiena. Kull sfida, kull rebħa, u kull battuta għenuni nikber mhux biss bħala plejer tal-futbol, iżda wkoll bħala persuna.”
“Għalkemm ma lħaqniex l-għan aħħari tagħna, ma nistax inkun aktar kburi bir-reżiljenza murija minn dan it-tim. Iġġielidna sal-aħħar nett, tajna dak kollu li kellna, u qatt ma waqafna nemmnu.”
“Nixtieq nirringrazzja lil sħabi tat-tim, lill-coaching staff, lill-klabb, u lill-partitarji talli kienu parti minn dan il-kapitlu. Il-fiduċja u l-appoġġ tagħkom ifissru ħafna.”
“Kull tmiem jimmarka l-bidu ta’ kapitlu ġdid. Issa nħares ’il quddiem b’eċċitament u determinazzjoni, lest li nilqa’ l-isfida li jmiss. Nawgura lil Tarxien Rainbows xejn ħlief suċċess fil-futur. Grazzi ta’ kollox!”
