Wara li kull team lagħab żewġ logħbiet issa jmiss it-tielet programm tal- Premier League Ingliż u meta erba’ timijiet għandhom punti massimi u ħamsa għadhom mingħajr punt, issa naraw x’se jiġri jiġifieri min se jikseb it-tielet rebħa u min se jibqa’ mingħajr l-ebda punt.
Ħarsa fuq fuq lejn il-programm naraw li d-Derby ta’ Londra ta’ għada fl-Emirates Stadium bejn Arsenal u Chelsea hija l-akbar attrazzjoni meta t-tnejn rebħu l-ewwel żewġ logħbiet tagħhom.
Il-Gunners bdew b’rebħiet kontra Coventry 3-0 u Aston Villa 1-0 u l-Blues l-ewwel għelbu lil Fulham 3-2 u wara lil Brighton 4-3.
Dan juri li Chelsea għandhom attakk tajjeb iżda d-difiża hija vulnerabbli waqt li Arsenal bħal Hull City għadhom ma qalgħux goal.
Għalhekk din il-logħba tista’ tara ħafna goals għalkemm iktar hemm ċans li tiġi minfuda d-difiża tat-team ta’ Xabi Alonso milli dik ta’ Mikel Arteta minkejja n-nuqqas ta’ William Saliba.
Iż-żewġ timijiet l-oħra b’punti massimi huma Manchester City u Hull City, tal-ewwel huma l-aristokratiċi tal-football Ingliż u Hull jinsabu lura mal-kbar wara nuqqas ta’ disa’ snin.
Is-City, b’Enzo Fernandez b’kollox, se jkunu fl-Etihad Stadium kontra kontra Coventry u għalhekk ma jidhirx li se jkollhom jitħabtu iktar milli jmisshom għat-tliet punti.
Min-naħa tagħhom it-Tigers se jilqgħu lil Aston Villa li għadhom ma skorjawx goal u anke huma bla punt. Iżda l-kwalitá tal-players tagħhom għandha tkun wisq għall-avversarji li għadhom telgħin miċ-Championship.
Il-logħba li se tiftaħ il-programm tal-lum hija dik f’St James Park li fiha Newcastle United jilqgħu lil Bournemouth meta d-differenza tal-punti bejniethom hija ta’ tlieta biss. Iżda d-differenza fil-pożizzjonijiet hija ta’ tmien postijiet.
Iż-żewġ timijiet jinsabu taħt managers ġodda, il-Magpies għandhom lil Matthias Jaissle u ċ-Cherries lil Marco Rose li huwa meqjus bħala wieħed ta’ kalibru f’pajjiżu l-Ġermanja.
Brentford se jkunu f’darhom kontra Sunderland b’dawn tal-aħħar jinsabu fl- Ewropa għall-ewwel darba wara 53 sena iżda l-Bees fallew li jingħaqdu magħhom fl-aħħar ġurnata tal-istaġun li għadda meta ġew draw 1-1 kontra Liverpool.
Logħba li tista’ jkollha bosta goals hija dik bejn Brighton u Leeds United li jinsabu mifrudin b’punt li jinsab favur it-team ta’ Daniel Farke.
Huma ġejjin minn żewġ rebħiet barra minn darhom kontra Nottingham Forest, waħda fil-League Cup u l-oħra fil-kampjonat, u għalhekk dan għandu jgħollilhom il- moral għal-logħbiet immedjati.
Min-naħa tas-Seagulls huma jidhru li se jibqgħu jagħtu logħba lil kulħadd meta għadhom taħt il-gwida tal-coach Fabian Hurzeler. Dan minħabba li għadu jattira element ta’ kwalitá minkejja li xi kultant il-clubs sinjuri jeħdulhom players li kapaċi jdawru logħba waħedhom.
Derby oħra ta’ Londra se jintlagħab f’Selhurst Partk li fiha Fulham jilqgħu lil Crystal Palace, żewġ timijiet li għadhom ma nqalgħux mill-art meta t-tnejn sofrew żewġ telfiet.
Il-Cottagers, li issa jinsabu taħt l-Ispanjol, Alvaro Arbeloa, li għandu esperjenza ma’ Real Madrid waqt li fl-Ingilterra kien jilgħab ma’ Liverpool.
Min-naħa tal-Palace huma qed jitmexxew mill-manager Pierre Sage u għalhekk għad irridu naraw x’differenza se jagħmel meta qed jimla post Oliver Glasner li jista’ għamel żball li ħalla postu mal-Eagles.
Nottingham Forest se jkunu fis-City Ground għal-logħba kontra Tottenham meta bħalissa l-Forest jinsabu punt fuq il-Hotspurs b’dawn tal-aħħar għadhom ma qabdux art tant li f’dawk li huma goals jinsabu b’differenza ta’ -5 bħal Aston Villa, li bħalhom inqabdu b’bidu diżastruż.
Spurs huma wieħed mill-clubs li fis-suq tas-sajf xtraw players b’għajnejhom magħluqa xi kultant anke jekk ikunu għaljin jidħlu għalihom.
Wara li fl-ewwel żewġ logħbiet Manchester United iltaqgħu kontra żewġ timijiet promossi, Hull City u Ipswich Town, u minn fuqhom ħadu tliet punti biss kontra t-Tractor Boys meta għelbuhom 5-2 wara li bdew ħażin b’telfa ta’ 2-0 kontra t-Tigers.
Għada l-United imorru fil-Hill Dickinson Stadium biex jiffaċċjaw lil Everton li kellhom bidu iktar diċenti b’rebħa u draw tant li jinsabu fis-seba’ post tal-klassifika meta anke qed jieħdu ħsieb il-kolonni tal-goals li bħalissa jaqraw 3-1.
Għall-United reġa’ daħal l-attakkant Marcus Rashford wara l-esperjenza li kellu ma’ Barcelona waqt li l-midfielder Portugiż, Bruno Fernandez, ta sehmu b’hat-trick kontra Ipswich.
Il-United jinsabu punt wara Everton u għalhekk riżultat tajjeb minn din il- logħba jista’ jarahom jitilgħu iktar ‘il fuq.
Il-logħba l-oħra fil-programm intlagħbet ilbieraħ filgħaxija b’Liverpool jiltaqgħu ma’ Ipswich f’Portman Road. Fiż-żewġ logħbiet li lagħbu r-Reds għadhom ma kienux minn fuq u għalhekk ikun interessanti naraw x’għamlu lbieraħ f’dan ir-rigward għalkemm fuq il-karta ma deherx li kellhom ifallu.
