Għat-tieni darba f’dawn l-aħħar ftit snin bħalissa tinsab fis-seħħ il-waqfa tax- xitwa li fiha kull team ikollu waqfa ta’ ġimgħatejn li fiha l-programm tal-21 ġurnata tal-Premier League Ingliż se tkun maqsuma f’10 timijiet jilagħbu fi tmiem din il-ġimgħa u l-10 l-oħra jilagħbu fi tmiem il-ġimgħa d-dieħla.
Dan il-programm jinkludi liż-żewġ timijiet ta’ Manchester li se jilagħbu kontra avversarji li jinsabu fin-naħa ta’ fuq tal-klassifika. Is-City se jmorru għand Newcastle waqt li l-United se jilqgħu lil Tottenham.
Iċ-champions sejrin f’St James Park b’rekord mhux daqstant familjari magħhom f’dawn l-aħħar snin meta mill-aħħar ħames logħbiet ħadu tliet rebħiet u draw u tilfu waħda għalkemm l-aħħar żewġ ħarġiet kienu rebħiet.
Mhux l-istess jista’ jingħad għall-Magpies li sofrew erba’ telfiet u kisbu rebħa biss bl-aħħar telfa tkun kontra Luton jumejn qabel il-Milied li xejn ma kienet mistennija.
Min-naħa tal-United, li jinsabu fit-tmien post, kisbu rebħa u draw biss fl-aħħar ħames logħbiet bit-tlieta l- oħra jitilfuhom.
Meta għadha għaddejja s- saga ta’ Jim Ratcliffe biex finalment jingħaqad mal-bord tal-club, it-team xejn mhu qed ikollu wirjiet tajbin minkejja li nhar it-Tnejn għelbu lil Wigan ta’ League One 2-0 fit-tielet round tal-FA Cup.
Barra minn hekk għandhom l-inċertezzi ta’ players deħlin u ħerġin mill-club bl- instabbiltá li qed ikollu l- club qed tirrifletti fuq il-players.
Il-programm jibda llum b’logħba bejn żewġ timijiet fiż-żona tar-relegazzjoni, Burnley u Luton Town, li se jiltaqgħu f’Turf Moor, fejn bħalissa l-Hatters qed igawdu erba’ punti vantaġġ fuq il-Clarets.
Il-logħba ta’ għada kmieni wara nofs in-nhar hija d-derby ta’ Londra li fiha Chelsea jilqgħu lil Fulham meta b’ kumbinazzjoni din il-ġimgħa ż-żewġ timijiet sfaw megħluba fl-ewwel legs tas-semi-finali tal-League Cup.
Il-Blues tilfu 1-0 b’goal fl- ewwel taqsima kontra Middlesbrough fir-Riverside Stadium waqt li l-Cottagers sfaw megħluba 2-1 minn Liverpool f’Anfield wara li kienu huma li marru fil-vantaġġ.
Il-logħba l-oħra f’dan il- programm ridott tara lil Everton jospitaw lil Aston Villa li jinsabu fit-tieni post tal-klassifika tliet punti wara l-leaders Liverpool.
It-Toffeemen se jkollhom lill-attakkant Dominic Calvert-Lewin fit-team wara li appellaw b’suċċess il-karta l- ħamra li ntwera kontra Crystal Palace fl-FA Cup.
