Monday, May 20, 2024

Produzzjoni mużikali Mamma Mia mill-istudenti tas-sitt sena tal-Iskola Primarja ta’ Birkirkara

Aqra wkoll

Fiċ-ċelebrazzjoni tal-50 anniversarju tal-grupp ikoniku ABBA, l-istudenti tas-sitt sena tal-Iskola Primarja ta’ Birkirkara ppreżentaw b’mod  spettakolari l-produzzjoni mużikali  “Mamma Mia”.  Il-melodiji klassiċi tal-grupp famuż ABBA ħadu l-ħajja f’adattament miktub mill-għalliema stess, fejn wera l-kreattività u l-entużjażmu tal-artisti żgħażagħ.

L-adattament tal-produzzjoni “Mamma Mia” ma kienx biss ġieħ għall-mużika leġġendarja tal-grupp ABBA iżda wkoll xhieda tal-ispirtu vibranti tal-istudenti u l-komunità tal-ġenituri. Il-produzzjoni, esegwita kollha kemm hi bil-Malti, offriet perspettiva ġdida fuq il-musical maħbub, u għamlitha aċċessibbli u pjaċevoli għall-udjenzi ta’ kull età.

Il-produzzjoni mużikali mhux biss uriet it-talenti tal-artisti ċkejkna, iżda serviet ukoll bħala esperjenza ta’ tagħlim siewi għall-istudenti. Permezz tal-parteċipazzjoni tagħhom, l-istudenti żviluppaw kunfidenza fuq il-palk, komplew isaħħu l-ħiliet ta’ ħidma f’tim, kif ukoll apprezzament aktar profond għall-arti performattiva. Kienet ċelebrazzjoni ta’ kreattività u kollaborazzjoni bejn l-edukaturi tas-sitt sena kollha.

Hekk kif ingħalqu l-purtieri fuq is-separju, kien evidenti li l-maġija tal-mużika tal-grupp ABBA kienet messet il-qlub ta’ kull min kien fl-udjenza. Il-produzzjoni kienet ta’ success kbir. Kulħadd ikkontribwixxa għas-suċċess tal-produzzjoni u b’hekk inħolqu memorji mill-isbaħ għal dawk kollha involuti. 

Fit-tifkira tal-50 anniversarju tal-grupp ABBA, l-Iskola Primarja ta’ Birkirkara mhux biss tat ġieħ lil dan il-grupp mużikali leġġendarju iżda wkoll ħolqot esperjenza indimentikabbli għal dawk kollha involuti. L-ispirtu ta’ “Mamma Mia” jibqa’ ħaj, jispira lill-ġenerazzjonijiet futuri biex iħaddnu l-ferħ tal-mużika u l-qawwa tal-espressjoni kreattiva.

ĦALLI RISPOSTA

Jekk jogħġbok ikteb il-kumment tiegħek!
Jekk jogħġbok iktebismek hawn

Sport