Raġel ta’ 25 sena minn Ħal Qormi nżamm arrestat wara li ġie akkużat b’numru ta’ reati, fosthom li kkawża ġrieħi gravi, ħtif, serq aggravat u li weġġa’ żewġ uffiċjali tal-pulizija.
Huwa allegatament kien iħajjar il-vittmi permezz tas-sit Grindr biex jiltaqa’ magħhom, u mbagħad jattakkahom u jisirqilhom flushom.
Quddiem il-Maġistrat Monica Vella, Nathan Magri, li qal li m’għandux impjieg, wieġeb mhux ħati tal-akkużi miġjuba kontrih.
Il-każ jmur lura għall-1 ta’ Jannar 2026, għall-ħabta tal-5.30am, meta l-pulizija sabu vittma minnhom fi stat ta’ xokk u bid-demm ħiereġ minn diversi partijiet ta’ ġismu qrib ir-residenza tal-akkużat.
Aktar tard, il-vittma qal li kien iltaqa’ mal-akkużat fuq Grindr u li mar id-dar tiegħu sabiex “jieħdu gost”.
Wara li kellhom kuntatt sesswali, il-vittma qal li nżamm kontra r-rieda tiegħu u ġie mhedded u mġiegħel biex jħallas xi flus.
Meta rrifjuta, l-akkużat ipprova wkoll jeħodlu l-mowbajl.
Il-vittma rnexxielu jaħrab. Huwa qal li ra żewġ persuni oħra fid-dar.
Il-pulizija fetħu investigazzjoni u talbu wkoll informazzjoni lill-kumpanija Grindr dwar l-akkużat.
It-tieni vittma rrakkontat każ simili.
Huwa qal li ltaqa’ mal-akkużat fuq l-istess app u mar fir-residenza, iżda beda jissuspetta li kien hemm xi ħaġa ħażina meta nnota li l-persuna li ra kienet differenti għalkollox mill-persuna li kien hemm fir-ritratti tal-profil.
Meta pprova jitlaq, allega li l-bieb ingħalaq u li ġie mhedded u attakkat.
Billi beża’ li seta’ joqtlu, qal lill-akkużat li kellu €40 fil-kont bankarju.
Huwa ttieħed sal-ATM qrib il-knisja ta’ San Bastjan f’Ħal Qormi, fejn ġibed il-flus u tahom lill-akkużat, u mbagħad tħalla jitlaq.
Il-qorti semgħet ukoll kif l-akkużat irreżista l-arrest bil-kbir.
Meta l-pulizija ppruvaw jaqbduh, huwa allegatament ħarab, tela’ fuq is-saqaf tar-residenza u qabeż għoli ta’ tliet sulari għal isfel.
Aktar tard, meta l-pulizija reġgħu marru fir-residenza tiegħu, kellhom jidħlu bil-forza u jużaw taser biex jikkontrollawh.
Żewġ uffiċjali ġarrbu ġrieħi ħfief waqt l-arrest.
Huwa jinsab mixli wkoll li kiser kundizzjonijiet ta’ ħelsien mill-arrest u li wettaq reati waqt perjodu ta’ probation.
Ma saritx talba għall-ħelsien mill-arrest.
Il-prosekuzzjoni tmexxiet mill-Ispettur James Mallia u l-akkużat kien assistit mill-avukat tal-għajnuna legali Martina Herrera