Manchester City se jappellaw kontra l-verdett ta’ tal-akkużi dwar il-maġġoranza l-kbira tal-115-il akkuża li ffaċċjaw mill-Premier League.
Il-Kap Eżekuttiv tal-club, Ferran Soriano, qal li s-City ma jaqblux mad-deċiżjoni tal-kummissjoni indipendenti u se jagħmlu kull sforz biex idawruha permezz ta’ appell u sfidi legali possibbli. Huwa qal ukoll li każ li ilu għaddej tmien snin se jieħu “ħafna aktar żmien” biex jasal għall-konklużjoni.
Il-kummissjoni indipendenti se tagħmel seduta oħra biex tiddetermina s-sanzjonijiet. Il-Premier League, li aġixxa bħala prosekutur fil-każ, se jkun jista’ jagħmel rakkomandazzjonijiet dwar il-pieni.
Fost il-possibbiltajiet hemm tnaqqis sostanzjali fil-punti, projbizzjoni fuq trasferimenti u multa. Il-panel għandu wkoll l-għażla li jeskludi lis-City mill-Premier League, għalkemm dan jista’ jħalli l-club mingħajr garanzija li jkun jista’ jilgħab fil-English Football League.
Persuni fil-football Ingliż jemmnu li s-serjetà u n-numru ta’ ksur tar-regoli jistgħu jwasslu għal tnaqqis fil-punti li jkun kważi ċert li jirriżulta f’relegazzjoni. Is-City jistgħu, madankollu, jirreferu għall-każ ta’ Chelsea, li wara ksur serju rċevew multi iżda ma ġewx penalizzati bi tnaqqis fil-punti, u jargumentaw li trattament differenti jkun inkonsistenti.
Fost l-akkużi hemm dik li s-City ippreżentaw informazzjoni finanzjarja mhux korretta, nefħu d-dħul mill-isponsorship, għamlu pagamenti mhux żvelati u ma kkooperawx mal-investigazzjoni. Waħda mill-akkużi kienet relatata wkoll mal-paga tal-eks coach, Roberto Mancini.
Is-City saħqu li l-proċess għadu għaddej u li l-club irrispetta l-proċess ġust matul it-tmien snin tal-investigazzjoni.
