Jiang Jun kiseb waħda mill-aktar rebħiet importanti fil-karriera tiegħu meta għeleb lil Ronnie O’Sullivan 5-2 fl-iShenzhen Open. Il-player Ċiniż ta’ 21 sena, introdott qabel il-partita bħala “L-Istilla li Qed Tqum u li Ma Tistax Titwaqqaf”, beda b’mod impressjonanti u ħa vantaġġ ta’ 2-0.
O’Sullivan, li għandu seba’ titli mondjali, irnexxielu jirreaġixxi u ġab il-partita indaqs wara li għamel breaks ta’ 92 u 52 punt.
Madankollu, dak kien l-aħħar mument pożittiv għalih, hekk kif Jiang rebaħ it-tliet frames ta’ wara biex għadda għall-aħħar 32. Fil-frame finali, it-talent żagħżugħ Ċiniż għamel break eċċellenti ta’ 108 punt. Fir-round li jmiss huwa se jiltaqa’ ma’ Zak Surety.
Jiang diġà kien wera l-potenzjal tiegħu fl-istaġun li għadda, meta wasal għall-ewwel żewġ kwarti tal-finali tiegħu f’tournaments ta’ ranking. Huwa għeleb players ta’ esperjenza bħal Mark Selby, Barry Hawkins u Dave Gilbert fit-triq tiegħu sal-aħħar tmienja tal-iScottish Open u l-Welsh Open. Din is-sena tilef b’mod ristrett 10-9 kontra Stan Moody fil-kwalifikazzjoni għall-Kampjonat tad-Dinja.
L-ewwel ġurnata tat-tournament kienet waħda diffiċli wkoll għal Mark Williams, li tilef 5-4 kontra Fan Zhengyi. Williams daħħal il-pink finali iżda mbagħad għamel in-off, u Fan approfitta biex jirbaħ il-frame deċiżiv.
Sorpriża oħra kienet l-eliminazzjoni tan-numru wieħed fid-dinja Zhao Xintong, li tilef 5-4 kontra Scott Donaldson. Zhao trabba fi Shenzhen u kien wieħed mill-uċuħ ewlenin tat-tournament.
Judd Trump, min-naħa l-oħra, beda b’rebħa ta’ 5-0 fuq Huang Jiahao, b’century u erba’ breaks oħra ta’ aktar minn 50 punt. Wara li Anthony McGill irtira għal raġunijiet mediċi, Trump għadda direttament għall-aħħar 16. Neil Robertson, Chris Wakelin u Si Jiahui wkoll għaddew għar-rawnd li jmiss.
