Antoine Monsigneur ta’ 52 sena ngħata sentenza ta’ sentejn ħabs wara li nstab ħati li m’obdiex u hedded uffiċjal tal-pulizija, beda jidgħi fil-pubbliku kif ukoll hedded mara. Il-każ instema quddiem il-Maġistrat Charmaine Galea.
Hu kien akkużat ukoll li sar riċediv, li kiser il-kundizzjonijiet imposti fuqu mill-Qorti u li wettaq reat waqt li kien taħt sentenza ta’ provation.
Il-każ seħħ fis-27 ta’ April li għadda meta l-Pulizija kienu rċivew rapport li kien hemm xi ġlied fil-venda tal-Qawra. Meta marru fuq il-post il-Pulizija sabu li Antoine Monsigneur kien tela’ fuq tal-linja b’riħa ta’ xorb u kellu argument ma’ żewġ turisti. Hu kien argument ukoll max-xufier hekk kif talbu biex jinżel minn fuq tal-linja.
Meta ġie mitkellem mill-pulizija Monsigneur kien qallhom li wieħed mit-turisti kien aggredih. Il-pulizija kienu qalulu li seta’ jagħmel rapport u anke jġib ċertifikat mediku. Iżda l-akkużat kien qal lill-pulizija li hu ma kienx se jġib l-ebda ċertifikat iżda kien se jibgħat lit-turist Mater Dei biex jagħmlulu ċertifikat tat-tambur ta’ widnejh.
Siegħa wara dan il-każ hu reġa’ ġie arrestat fuq każ ieħor u kien sfida lill-pulizija għal ġlied. Hu kien hedded uffiċjal tal-pulizija li kien se jifqgħu b’ċintorin.
Fil-proċeduri tal-Qorti, il-Prosekuzzjoni qalet li siegħa wara li hu nħeles mill-arrest kien hemm argument ieħor bejn mara u raġel f’San Pawl il-Baħar. X’ħin waslu fuq il-post raw mara ħierġa minn supermarket tgħajjar għall-għajjut għax skont hi kienet għada kemm ġiet mhedda.
Il-Prosekuzzjoni qalet li l-pulizija li marru fuq il-post sabu lill-akkużat fis-supermarket u ħarġuh. Kien hawn li meta ġie mistoqsi x’ġara u beda jinsulenta lill-pulizija u għalhekk reġa’ ġie arrestat.
Il-Pulizija wara li nformawh li kien qiegħed jiġi arrestat Antoine Monsigneur reġa’ stieden lill-Pulizija għall-ġlied. Wara li ttieħed l-għassa, l-akkużat hedded pulizija li jekk jerġa’ jmissu kien se jagħtih daqqa ta’ ras f’wiċċu u qallu biex ineħħilu l-manetti biex ikun jista’ jagħti xeba’ u jifqgħu. L-akkużat kien qal lill-pulizija li jekk kien se jitniżżel fil-lock up kien se jdawwarlu ċinturin ma’ għanqu u jgħallqu.
Intant, il-mara li sfat mhedda fis-supermarket xehdet li kienet saret taf lill-akkużat xi erba’ snin qabel u kienu għamlu ftit jiem f’relazzjoni. Huma kienu reġgħu ltaqgħu xi tlett ijiem qabel seħħ il-każ u kienet hi li stidnietu għal drink fl-appartament tagħha.
Fix-xhieda tagħha, il-mara qalet li l-akkużat ried ikollu x’jaqsam magħha, iżda hi ma riditx. Hu kien qallha li se jġibha “black and blue bħall-uniformi tal-pulizija”. Dakinhar ukoll kien heddidha li kien se jitfagħha minn fuq għal isfel jekk ma jkollix x’taqsam miegħu.
Meta seħħ l-inċident hi kienet is-supermarket u l-akkużat mar ħdejjha. Kienet qaltlu li trid tmur id-dar waħedha għax kellha xi affarijiet x’tagħmel. Kien hawn li Antoine Monsigneur beda jidgħi, heddidha li jifqa’ l-ħġieġ tas-supermarket biha u anke ta daqqa ta’ ponn f’għonqha. Hi qalet li kienet waqgħet mal-art u x’ħin qamet sabet lin-nies iċemplu lill-pulizija.
Antoine Monsigneur għażel li jixhed f’dawn il-proċeduri fejn qal li hu kien f’relazzjoni mal-mara madwar seba’ snin ilu. Xehed li dak iż-żmien hija kienet tieħu d-droga fosthom il-kokaina u sid il-kera fejn kienet tgħix keċċijha ‘l barra.
Qal li ftit qabel l-inċident kien reġa’ ltaqa’ magħha u kienu marru flimkien is-supermarket.
Xehed li hu kien qallha li kien se joħroġ jistennija barra, iżda hekk kif ħareġ sab lill-pulizija jistennewh. Hu ħaseb li kienu marru hemm minħabba rapport ta’ serq. Hu ċaħad li ta daqqa lil mara fis-supermarket u kien hu li ried jitlaq lejn id-dar waħdu.
Il-Qorti qalet li dan il-każ kien maqsum fuq tliet episodji. Il-Maġistrata qalet li minn filmati ta CCTV li hemm fis-supermarket iż-żewġ persuni jidhru jillatikaw, iżda fl-ebda ħin ma jidher jagħtiha daqqa kif qalet hi. Miċ-ċertifikati mediċi juru li weġġgħet ħafna u ma kellix marki ta’ xi daqqa ta’ ponn.
Iżda dwar l-akkuża li m’obdiex ordnijiet tal-pulizija dan kollu ħarġet ċar mill-bodycams li għandhom l-istess pulizija mal-uniformi.
Fis-sentenza tagħha l-Qorti qalet li r-raġel minkejja li f’każi passati ngħata kull għajnuna xorta waħda baqa’ ma tgħallem xejn u baqa’ b’atteġġjament ta’ sfida, jinġurja u jhedded lill-Pulizija.
Il-Qorti sabitu ħati tal-akkużi kollha kontrih minbarra dik li weġġa’ lill-mara. Il-Qorti kkundannatu sena ħabs u multa ta’ €2,000. L-istess Qorti kkundannatu sena ħabs oħra b’rabta ma’ sentenza sospiża li kien ingħata f’Jannar ta’ dn is-sena.
Il-Maġistrat ħarġet ordni ta’ protezzjoni favur l-uffiċjali tal-pulizija nvoluti u l-mara għal tliet snin.