Lorenzo Pellegrini skorja fit-tieni minuta u Paolo Dybala kiseb doppjetta hekk kif Roma għelbu lil Cagliari bl-iskor ta’ 4-0 fis-Serie A nhar it-Tnejn biex din kienet ir-raba’ rebħa konsekuttiva mindu l-coach Daniel De Rossi ngħata t-tmexxija tat-team.
Din ir-rebħa kienet tfisser ukoll li l-Giallorossi telgħu fil-ħames post, żewġ punti inqas minn Bologna.
Huma ma setgħux kellhom bidu aħjar hekk kif wara 93 sekondi Pellegrini fetaħ l-iskor minn azzjoni ta’ corner.
Imbagħad, il-21 minuta, Dybala beda azzjoni li fiha kienu nvoluti erba’ players li spiċċat bl-attakkant Arġentin jixħet fix-xibka wara li rċieva minn daqqa ta’ takkuna ta’ Pellegrini, b’Romelu Lukaku jagħmel finta biex qarraq bid-difiża avversarja.
Fil-51 minuta, Dybala aċċerta r-rebħa minn penalty biex id-difensur Olandiż ta’ 19-il sena, Dean Huijsen, li huwa misluf mingħand Juventus, irreġistra l-ewwel goal tiegħu mar-Romanisti permezz ta’ daqqa ta’ ras.
Il-partita li jmiss se tkun test diffiċli għal De Rossi hekk kif jospitaw lil-leaders Inter.
