Ludwig Bugeja ta’ 45 sena minn Raħal Ġdid kien ikkundannat sitt snin ħabs wara li nstab ħati li wettaq diversi serqiet bejn Jannar u Frar tal-2019.
Bugeja kien tressaq il-Qorti mixli li seraq vettura Isuzu f’Raħal Ġdid, li f’żewġ okkażjonijiet oħra seraq minn ġewwa supermarket f’Ħal Tarxien, li kien kompliċi f’serqa oħra minn stabbiliment f’Santa Venera u li sar reċediv.
Fil-Qorti ħareġ li nhar is-27 ta’ Frar 2019, il-manager tas-supermarket ta’ Ħal Tarxien irrapporta li kienu nsterqu 17-il xafra tal-leħja u tliet razor blades, li l-ammont tagħhom jaqbeż it-€300.
Huwa żied jgħid li l-istess persuna li serqet dawn l-affarijiet, ftit tal-jiem wara serqet ukoll mill-istess supermarket ħames body groomers li jammontaw għal iżjed minn €100.
Mill-filmati tas-CCTV cameras, il-Pulizija waslu għal konklużjoni li l-persuna li tidher tisraq mis-supermarket kien l-imputat Bugeja, għax hu magħruf mal-pulizija u kellu diversi każijiet oħra l-Qorti. Minn aktar stħarriġ irriżulta li l-Pulizija rrealizzat li l-imputat kien involut f’serq ta’ vettura u allegatament kien kompliċi f’serqa minn ħanut.
Wara li rat li ġew ippruvati l-akkużi miġjuba kontra Bugeja, il-Qorti preseduta mill-Maġistrat Marse-Ann Farrugia għaddiet biex tagħti s-sentenza. Hija kkunsidrat diversi fatturi fosthom il-fedina rafrettarja ta’ Bugeja, fejn għandu mhux inqas minn 23 kundanna minn dawn il-Qrati. Dawn jinkludu numru ta’ kundanni għal pussess sempliċi tad-droga, pussess aggravat tad-droga u anke traffikar ta’ droga fost oħrajn.
Il-Qorti qalet ukoll li huwa ngħata diversi opportunitatajiet biex jirriforma ruħu permezz ta’ ordnijiet ta’ probation kif ukoll ingħata diversi sentenzi ta’ priġunerija effettivi. “Però jidher li l-imputat baqa’ ma tgħallem xejn u għadu jippersisti li jibqa’ jgħix fil-ħajja ta’ kriminalità li sfortunatament qabad snin twal ilu.”
“Il-ħajja tal-imputat għal dawn l-aħħar 26 sena, ma tħalli l-ebda dubju moħħ din il-Qorti li l-imputat mhux kapaċi jibda u jsegwi l-programm ta’ rijabilitazzjoni jekk mhux f’ambjent konfinat u kontrolat, bħalma hija l-Faċilità Korrettiva ta’ Kordin.
“Jeħtieġ jekk verament l-imputat irid jindirizza l-vizzju tiegħu ta’ abbuż ta’ droga li bl-għajnuna tal-professjonisti li hemm ġewwa l-ħabs isir pjan ta’ kura bil-għan li l-istess imputat jista’ jikseb il-frott mixtieq minn kulħadd, fl-interess tiegħu kif ukoll fl-interess tas-soċjetà,” tenniet il-Qorti.
Għal dawn ir-raġunijiet, il-Maġistrat Farrugia sabitu ħati tal-akkużi miġjuba kontra tiegħu u kkundannatu għall-piena ta’ sitt snin ħabs. Huwa kien ordnat ukoll iħallas il-flejjes kollha li seraq mingħand persuni u stabbiliment.
Il-Prosekuzzjoni tmexxiet mill-Ispettur Sarah Kathleen Zerafa.
