Saturday, April 5, 2025

TARIFFI U INFLAZZJONI

Aqra wkoll

Il-gvern Amerikan nieda strateġija ta’ żieda fit-tariffi tad-dwana fuq firxa wiesgħa ta’ prodotti importati kważi mid-dinja kollha. Fuq quddiem nett, pajjiżi ġirien u/jew alleati, imma mhux biss – il-Kanada, il-Messiku, l-Unjoni Ewropea, ir-Renju Unit, il-Ġappun, kif ukoll iċ-Ċina fost oħrajn. L-argument hu li dawn il-pajjiżi rnexxielhom jidħlu fl-Istati Uniti biex ibigħu il-prodotti tagħhom bl-irħis u kissru l-fabriki u l-impjiegi Amerikani.

Fl-istess ħin l-amministrazzjoni ta’ Trump trid tara kif se twettaq il-wegħda li trażżan l-għoli tal-prezzijiet. Problema tifhem kif dan se jsir.

Taqbel jew le maż-żieda fit-tariffi Amerikani, ftit hemm dubju li se tfisser żidiet fil-prezzijiet. Talanqas f’perspettiva qasira jew medja ta’ żmien. Il-protezzjoni ta’ prodotti maħduma bi prezzijiet għolja fl-Istati Uniti se tfisser li l-konsumaturi Amerikani se jkollhom iħallsu aktar għalihom. Jistgħu ukoll jiddeċiedu li ma jixtru xejn biex jistennew li l-prezzijiet jerġgħu jitbaxxew, deċiżjoni li tista’ tagħti daqqa qawwija lill-ekonomija Amerikana kollha.

JUM IL-ĦELSIEN

Il-briju li snin twal ilu, Jum il-Ħelsien kien jiġi ċelebrat bih ilu li ntesa. Il-ħajja tibqa’ tiżviluppa, l-avvenimenti tal-lum inessu dawk tal-bieraħ u tal-bieraħt lura. Illum Jum il-Ħelsien jitqies bħala vaganza publika li għandha tiġi kommemorata b’liturġija statali li l-ġenerazzjonijiet żgħażagħ ftit jifhmu jew jimportahom minnha. L-istess ġara, għalkemm b’rata anqas imħarrka, lil Jum l-Indipendenza.

Jum il-Ħelsien bla dubju jimmarka data essenzjali fl-istorja moderna tal-pajjiż: lil hinn mill-kontroversji ideoloġiċi u partiġġjani li qajjem fl-imgħoddi, għandu jibqa’ jinżamm bħala jum ta’ ġieħ nazzjonali. Imma forsi jixraqlu li jiġi jaġġornat biex ikun ċelebrat fuq kollox, bħala l-għażla mill-pajjiż tal-istatus tan-newtralità – għażla mibnija fuq il-pedamenti tal-Indipendenza.

TISJIR FID-DAR

Minn dak li jintqal u jiġi pubblikat dwar it-tqassim permezz tal-Bolt/Wolt ta’ ikel fid-djar toħroġ stampa ta’ bidla sħiħa f’kif il-familji jħejju l-ikel tagħhom. L-impressjoni kbira hi li t-tisjir fid-djar naqas sew. Minflok, ħafna saru jieklu ikel miġjub lilhom bil-motorcycle minn ristoranti u snackbars. Nimmaġina li dil-ħaġa qed tiġri kullimkien. Xorta, wieħed ma jistax jaħrab mill-idea li fostna qed tiġri aktar minn f’imkejjen oħra. Għaliex?

Fost ir-raġunijiet li ngħatajt: Il-Maltin għoġbithom l-idea li ħaddieħor isajjar għalihom. Il-familji ddejqu bl-ikel imsajjar id-dar. Il-moda tal-fast foods saret dominanti. In-nisa qed jaħdmu aktar u aktar barra d-dar, u m’għandhomx ċans isajru. L-irġiel baqgħu juru ftit wisq interess fit-tisjir. L-ikel li ssajjar id-dar hu anqas tajjeb minn dak li ġġib minn barra. Aktar ma tnaqqas il-ħin issefter fil-kċina, aktar se titjieb il-kwalità tal-ħajja.

Jissemmew raġunijiet oħra. Ma nafx liema huma t-tajba.

ĦALLI RISPOSTA

Jekk jogħġbok ikteb il-kumment tiegħek!
Jekk jogħġbok iktebismek hawn

Sport