Novak Djokovic kiser rekord ieħor tat-tennis li darba kellu Roger Federer, meta sar l-iktar player anzjan li ġie kklassifikat fil-post numru wieħed fir-rankings kompjuterizzati tal-ATP Tour.
Djokovic għandu 36 sena u 321 jum – jagħlaq 37 sena x- xahar id-dieħel – u issa huwa akbar minn dak li kien Federer fl-aħħar ġurnata tiegħu fil-quċċata tal-klassifika f’Ġunju, 2018. Nhar it-Tnejn Djokovic daħal fl-420 ġimgħa totali f’dan il-post, u jestendi marka oħra ta’ storja ta’ Federer (li kien hemm għal 310 ġimgħat) kellu darba qabel Djokovic kissirha.
L-24 titlu tas-singles tal-Grand Slam ta’ Djokovic huma wkoll l-aktar minn player fl-istorja tat-tennis u l-aktar minn xi ħadd fl-Era Open, li bdiet fl-1968. Federer kiser ir-rekord tal-irġiel ta’ Pete Sampras ta’ 14-il kampjonat ewlieni u rtira b’20, qabel Rafael Nadal (issa bi 22 titlu) u Djokovic għaddih.
Djokovic jiddaħħal din il-ġimgħa fit-tournament tat-tafal tal-Monte Carlo Masters hekk kif qed jipprepara biex jiddefendi t-titlu tiegħu tal-French Open, fejn il-logħob jibda fis-26 ta’ Mejju. Se tkun l-ewwel azzjoni kompetittiva ta’ Djokovic minn meta dan l-aħħar infired mill-coach Goran Ivanisevic.
Huwa żamm il-post numru wieħed minn meta rritorna hemm l-aktar riċenti f’Settembru li għadda wara li rebaħ il-US Open.
B’Federer irtirat u Nadal jissielet mal-injuries, Djokovic huwa l-aħħar mill-Big Three li jirbħu regolarment fit-tour. Huwa ma ffissax data dwar l-irtirar tiegħu stess iżda stqarr li din tinsab f’moħħu.
“Biex inkun onest, jien xi ftit inċert dwar l-irtirar,” qal Djokovic f’Jannar. “Dejjem hemm parti minni li hija tifel żgħir li jħobb it-tennis u jaf biss dwar it-tennis u ddedika ħajtu kollha għat-tennis u dak it-tifel xorta jrid jibqa’ għaddej.
“U mbagħad, min-naħa l-oħra, jien missier ta’ żewġt itfal, u nkun ‘il bogħod mill-familja tiegħi, u kull darba li nivvjaġġa għal perjodu estiż jaqtgħuli qalbi. Allura dejjem naħseb dwar kemm tul għandi nilgħab, kemm tournaments għandi nilgħab … dan kollu huwa vijabbli?”
Forsi l-aħħar rekord għal Djokovic se jkun qed isir l-iktar player anzjan fl-istorja li rebaħ Grand Slam. Bħalissa huwa l-Awstraljan, Ken Rosewall, li għandu dan ir-rekord għal 37 sena, xahar u 24 jum.
B’għeluq is-37 sena ta’ Djokovic ix-xahar id-dieħel, jista’ jkun li naraw li dan ir-rekord iseħħ.
Iċ-champion tal-Australian Open, Jannik Sinner, baqa’ fit-tieni post tar-rankings li għadhom kif tħabbru, segwit minn Carlos Alcaraz, Daniil Medvedev u Alexander Zverev, kollha fl-istess postijiet bħal ġimgħa ta’ qabel.
Fil-kategorija tal-WTA, il-Pollakka Iga Swiatek baqgħet fin-numru wieħed, quddiem Aryna Sabalenka tal-Belarus fin-numru tnejn u warajha jiġu l-Amerikana Coco Gauff, il-Kazakstana Elena Rybakina u l-Amerikana l-oħra, Jessica Pegula.
