It-tennista Awstraljan ta’ 31 sena, Nick Kyrgios, huwa eliġibbli biex jirritorna għat-tennis wara li temm sospensjoni ta’ xahar talli nstab pożittiv għall-kokaina.
Il-kampjun ittieħed waqt il-Mallorca Open, f’Ġunju li għadda, u kien fih benzoylecgonine, metabolit tal-kokaina.
Kyrgios ammetta li kien uża l-kokaina f’Magaluf, barra mill-kompetizzjoni, u għalhekk l-ITIA naqqset is-sospensjoni potenzjali ta’ tliet xhur wara li daħal fi programm ta’ trattament.
Minbarra s-sospensjoni, tilef ukoll €6,570 fi premju. Il-karriera tiegħu ġiet affettwata minn injuries fl-irkoppa u fil-polz, u dan l-istaġun lagħab biss erba’ logħbiet tas-singles.
Kyrgios ilu figura kontroversjali minħabba l-imġieba tiegħu fil-court u kummenti kontroversjali.
Madankollu, huwa wkoll tkellem b’mod miftuħ dwar il-problemi tiegħu mas-saħħa mentali.
Fil-karriera tiegħu huwa rebaħ seba’ titli ATP u wasal sal-finali ta’ Wimbledon fl-2022.
