Li nkunu kapaċi nisimgħu hija xi ħaġa li ħafna minna forsi xi kultant ma tantx nagħtuha daqshekk importanza iżda għal dawk li jew jitwieldu jew jiżviluppaw xi problemi tas-smigħ matul il-ħajja tagħhom, is-sitwazzjoni jaf tippreżenta ruħha bħala ftit jew wisq diffiċli xi kultant.
Fl-aħħar sigħat tifel ta’ disa’ xhur li twieled b’nuqqas ta’ smigħ ingħata rigal mill-isbaħ matul dawn iż-żminijiet ta’ festa hekk kif għall-ewwel darba f’ħajtu seta’ jisma lill-ġenituri tiegħu grazzi għal intervent li għamel li jissejjaħ ‘cochlear implant surgery’.
F’filmat li ġie ppubblikat fl-aħħar sigħat jidher iċ-ċkejken Everett Colley jirreaġixxi għall-vuċi tal-ġenituri tiegħu b’emozzjoni kbira u jdur fuq ommu li, b’ferħ kbir, ħadnitu magħha.
Ommu Ashley, minn Yorktown ġewwa l-Amerka, qalet li tinsab ċerta li r-reazzjoni tal-biċċa l-kbira tan-nies meta jsiru jafu għall-ewwel darba li t-tarbija tagħhom għandha nuqqas ta’ smigħ hija bħal tagħhom, li jfisser li jaħsbu li hija xi ħaġa orribbli. Tistqar iżda li tgħallmu li mhix daqshekk orribbli hekk kif iċ-ċkejken tagħhom għandu perspettiva lejn il-ħajja li huma m’għandhomx.
