Il-Finali tal-Kampjonat MAPFRE Silver se ssir fil-Malta Equidrome nhar il-Ġimgħa, 6 ta’ Novembru, fid-9:05pm, bi 12-il żiemel jikkompetu għal dan it-titlu prestiġjuż.
Il-kampjonat, organizzat mill-Malta Racing Club, ġibed 76 żiemel fil-kategorija Silver, b’seba’ tiġrijiet ta’ kwalifikazzjoni li saru fid-9 ta’ Ottubru. B’kollox, 32 żiemel għaddew għat-tliet semifinali li saru fit-23 ta’ Ottubru, u minn dawn ħarġu t-12-il finalista.
L-edizzjoni ta’ din is-sena timmarka pass importanti, hekk kif MAPFRE saret l-isponsor ewlieni ta’ kampjonat tal-Malta Racing Club għall-ewwel darba; dan ikompli jsaħħaħ ir-rabta fit-tul li l-kumpanija għandha mat-tiġrijiet taż-żwiemel f’Malta.
Waqt konferenza stampa li għaliha attendew rappreżentanti tal-organizzazzjonijiet involuti, il-Kap tal-Operazzjonijiet ta’ MAPFRE, Keith Tanti, esprima s-sodisfazzjon tal-kumpanija li qed tappoġġja dan l-isport. Min-naħa tiegħu, il-Kap Eżekuttiv tal-Malta Equidrome, Dr Matthew Brincat, laqa’ dan l-isponsorjat u enfasizza l-isforzi kontinwi biex titjieb l-esperjenza tat-tiġrijiet kemm għall-parteċipanti kif ukoll għall-ispettaturi.
Il-Kap Eżekuttiv ta’ EquestriMalta, Max Zammit, saħaq ukoll fuq l-importanza tal-kollaborazzjoni bejn l-organizzazzjonijiet sportivi u l-kumpaniji privati biex jiġi appoġġjat l-iżvilupp tat-tiġrijiet taż-żwiemel f’Malta.
Sadanittant, il-Viċi-President tal-Malta Racing Club, Tony Demanuele, irringrazzja lil MAPFRE għall-appoġġ kontinwu tagħha u faħħar il-parteċipazzjoni kif ukoll il-livell kompetittiv muri matul il-fażijiet ta’ kwalifikazzjoni.
Sar ukoll it-tlugħ tal-poloz għall-pożizzjonijiet tat-tluq għall-finali tal-Ġimgħa, bit-12-il finalista jippreparaw biex jikkompetu kif ġej:
Mr Zimmerman
Histrio
Genievre
Infinity of Joy
Iniesta Sport
Ice Dream Royal
Hawk Speed
Indiana Buroise
Fast
Harry Challeonnais
Kamila des Monts
Sara J.E.
