Żewġ tobba tal-emerġenza rrakkontaw lill-ġurati t-Tlieta kif pruvaw isalvaw il-ħajja ta’ Isaac Kwabena Kyere, ta’ 23 sena, wara li qalbu kienet waqfet kawża ta’ diversi daqqiet ta’ sikkina fil-Marsa f’Ġunju tal-2021. Ix-xhieda tagħhom ingħatat fit-tieni jum tal-ġuri ta’ Amo Frank Kwaku, ċittadin tal-Ghana ta’ 30 sena, li jinsab akkużat li ta daqqiet ta’ sikkina lil Kyere u qatlu wara argument.
Kwaku jinsab akkużat b’omiċidju volontarju, sekwestru ta’ persuna akkumpanjat minn offiża fuq il-persuna, li ġarr arma waqt it-twettiq ta’ reat kontra persuna, kif ukoll li ma obdiex l-ordnijiet tal-pulizija waqt li allegatament ipprova jaħrab mill-arrest. Kyere qala’ mill-inqas 18-il daqqa ta’ sikkina, fosthom erba’ daqqiet f’sidru u f’żaqqu.
L-ewwel tabib li xehed, Michael Spiteri, qal lill-Qorti li kien intbagħat il-Marsa bħala parti mit-tim tal-emerġenza mill-isptar, wara li daħlu rapporti dwar persuna f’kundizzjoni kritika li kienet sofriet diversi daqqiet ta’ sikkina.
Uffiċjali tal-pulizija kienu diġà fuq il-post meta wasal it-tim mediku.
It-tabib qal li sab lil Kyere miksi bid-demm u b’diversi feriti kkawżati minn daqqiet ta’ sikkina. It-tabib irrakkonta li l-vittma kienet diġa waqfitlu qalbu u u t-tim mediku mill-ewwel beda jagħtih is-CPR. It-tobba wettqu diversi interventi mediċi ta’ emerġenza biex jippruvaw jerġgħu jqajmulu qalbu. Kyere ġie intubat biex jinżamm miftuħ l-passaġġ tan-nifs, filwaqt li saru wkoll proċeduri biex jiġi indirizzat demm jew arja li setgħu akkumulaw madwar il-pulmun. Minħabba t-telf kbir ta’ demm, Kyere ngħata wkoll id-demm fuq il-post.
It-tabib identifika żewġ feriti bħala partikolarment serji, waħda fuq in-naħa tax-xellug ta’ sidru u oħra f’żaqqu. “Il-ferita f’sidru kienet partikolarment inkwetanti minħabba kemm kienet fonda,” xehed it-tabib.
Kyere eventwalment ittieħed l-Isptar Mater Dei, fejn komplew it-tentattivi biex isalvawh. Minkejja l-isforzi tat-tim mediku, huwa miet ftit wara li wasal fid-Dipartiment tal-Emerġenza.
It-tieni tabib tal-emerġenza, Jonathan Joslin, li wkoll kien xogħol dak il-lejl, qal li kien irċieva sejħa ta’ “code red trauma” dwar każ ta’ daqqiet ta’ sikkina fil-Marsa. L-ewwel informazzjoni li rċieva kienet tindika li l-vittma kienet f’kundizzjoni kritika ħafna. Huwa qal li Kyere nstab viċin il-pont fi Triq il-Marsa u li kienet waqfitlu qalbu minħabba t- trawma li kien ġarrab.
“Ma kellux polz,” ftakar it-tabib.
Joslin xehed li t-tim mediku beda il- kompressjonijiet fuq sidru, intubah u tratta l- kumplikazzjonijiet serji li rriżultaw mill-ġrieħi f’sidru. Huwa kkonferma wkoll li Kyere ngħata d-demm.
It-tabib qal li qalb Kyere baqgħet mingħajr attività minkejja it-tentattivi kollha. Minkejja l-interventi li saru kemm fuq il-post kif ukoll l-isptar, it-tobba qatt ma rnexxielhom jerġgħu jistabbilixxu polz.
Huwa wkoll identifika l-feriti fuq in-naħa tax-xellug tas-sider u fiż-żaqq bħala fost l-aktar serji u semma wkoll ġrieħi konsistenti ma’ feriti difensivi.
Waqt il-kontro-eżami, iż-żewġ tobba qablu li Kyere kien raġel mibni. It-tobba qalu li l- fiżika ta’ persuna ma kellhiex rilevanza mil-lat mediku.
Saru wkoll mistoqsijiet dwar il-viżibbiltà fuq il-post, li ġie deskritt bħala żona relattivament imwarrba u mudlama. It-tobba spjegaw li hija prattika normali għall-ħaddiema tal-emerġenza li jużaw torċijiet meta jkunu qed jassistu pazjenti f’postijiet mudlama.
Argument fuq flixkun whiskey
L-att tal-akkuża jallega li matul il-lejl ta’ bejn l-10 u l-11 ta’ Ġunju 2021, Kwaku u Kyere kienu fid-dar ta’ ħabib fil-Marsa meta nqala’ argument bejniethom. Il-prosekuzzjoni qed tallega li Kwaku ħareġ mir-residenza l-ewwel, b’Kyere joħroġ ftit wara. It-tnejn allegatament reġgħu ltaqgħu viċin il-pont pedonali fl-inħawi ta’ Triq it-Tiġrija, fejn Kwaku allegatament attakka lil Kyere b’sikkina.
Matul il-kumpilazzjoni tal-provi, xhieda qalu li l-argument kien beda fuq flixkun whiskey qabel kompla barra fit-triq. Xhud qal li f’ħin minnhom Kyere kien qabad sikkina tal-kċina bħallikieku qed jhedded lil Kwaku, filwaqt li xhud ieħor qal li ra liż-żewġt irġiel jiġġieldu fit-triq qabel Kyere waqa’ mal-art.
Kwaku nstab diversi sigħat wara fi proprjetà fi Triq Azzopardi. Minn provi mressqa fi proċeduri preċedenti rriżulta li huwa pprova jaħrab minn fuq il-bjut qabel ġie arrestat. Il-pulizija sabet ukoll sikkina, li huwa maħsub li kienet l-arma użata fid-delitt, taħt siġra fil-qrib.
L-Ispettur Kurt Zahra kien xehed waqt il-preżentata ta’ Kwaku li l-akkużat ammetta li qatel lil Kyere meta nqabad u aktar tard tenna din l-ammissjoni waqt l-interrogazzjoni fil-Kwartieri Ġenerali tal-Pulizija. L-Ispettur Wayne Camilleri xehed ukoll li meta Kwaku ġie infurmat li Kyere kien miet, deher ixxukkjat u allegatament qal kliem fis-sens li kien qatlu. Skont l-ispettur, Kwaku deher li kien jemmen li Kyere kien weġġa’ serjament, iżda ma kienx miet.
Minkejja dan, Kwaku wieġeb mhux ħati għall-akkużi miġjuba kontrih.
F’Marzu tal-2025, l-Imħallef Consuelo Scerri Herrera ċaħdet talba ta’ Kwaku biex żewġ stqarrijiet li kien ta lill-pulizija jiġu ddikjarati inammissibbli. Kwaku kien argumenta li ma kienx ingħata d-drittijiet kollha tiegħu meta ttieħdu l-istqarrijiet u talab li dawn ma jiġux ammessi bħala prova fil-ġuri. Il-Qorti, iżda, sabet li l-pulizija kienet infurmatu bid-drittijiet legali tiegħu, fosthom id-dritt għal avukat, u kienet staqsietu jekk jifhimx bl-Ingliż jew jekk kellux bżonn interpretu. Huwa kien ġie infurmat ukoll li l-istqarrijiet tiegħu kienu se jiġu rrekordjati. Kwaku għażel li jwieġeb il-mistoqsijiet tal-investigaturi u indika li kien jifhem bl-Ingliż.
L-Avukat Ġenerali qed jitlob piena ta’ għomor il-ħabs fuq l-akkuża ta’ omiċidju volontarju, sa sitt snin ħabs fuq l-akkuża ta’ sekwestru ta’ persuna u sa erba’ snin ħabs fuq l-akkuża relatata mal-arma. Fuq l-akkuża li ma obdiex lill-pulizija u pprova jaħrab, l-Avukat Ġenerali qed jitlob sa xahrejn detenzjoni.
Il-prosekuzzjoni qed titmexxa mill-avukati tal-Uffiċċju tal-Avukat Ġenerali Kaylie Bonett u Michael Muscat, flimkien mal-Ispettur Wayne Camilleri. L-avukat tal-għajnuna legali Josette Sultana qed tidher għal Kwaku. L-Imħallef Consuelo Scerri Herrera qed tippresiedi l-ġuri.