Andorra ……0
Malta …….…1
Minn Cristian Muscat
Wara t-telfa diżappuntanti ta’ 2-0 kontra l-Moldova, it-team nazzjonali Malti wettaq reazzjoni mill-aqwa, qam għall-okkażjoni u b’wirja ferm pożittivagħeleb lil Andorra bl-iskor ta’ 1-0, grazzi għal kanunata ta’ Ryan Camenzuli lejn tmiem l-ewwel taqsima … liema partita kienet valida minn Grupp D2 ta’ kwalifikazzjoni għall-UEFA Nations League.
Kien fid-19-il minuta li waslet l-ewwel azzjoni denja ta’ nota bil-Maltin ikunu huma li joħolqu l-periklu meta minn free-kick qasir ta’ Teddy Teuma, huwa għadda lejn Joseph Mbong li venven xutt mid-distanza li ġie mdawwar f’corner mill-goalkeeper, Iker Alvarez.
Il-Maltin komplew jippressaw u inqas minn minuta wara Carlo Zammit Lonardelli kellu d-daqqa ta’ ras minn taħt il-lasta toħroġ ir-riflessi mpekkabbli ta’ Alvarez li dawwar f’corner b’mod providenżjali u spettakolari.
Fis-27 minuta, Ryan Camenzuli, kellu tentattiv xi ftit dgħajjef li ntemm barra mingħajr wisq periklu għall-avversarji.
Madankollu, fil-45 minuta il-Maltin fetħu l-iskor meta minn cross ta’ Matthew Guillaumier, id-difiża ta’ Andorra ppruvat tbiegħed il-periklu, b’Luke Montebello jħalli l-ballun lil RYAN CAMENZULI li kien ġej bil-ġirja minn fuq ix-xellug li venven kanunata u sammar il-ballun fir-rokna tax-xibka … biex dan kien l-ewwel goal tiegħu mat-team nazzjonali.
Andorra ħarġu ferm aggressivi fil-ftuħ tat-tieni taqsima u resqu viċin li jġibu l-iskor indaqs meta fit-52 minuta Albert Rosas approfitta minn indeċiżjoni fid-difiża Maltija, avvanza tajjeb fil-kaxxa, ġie wiċċ imb wiċċ ma’ Henry Bonello, iżda ra t-tentattiv tiegħu salvat bis-sieq mill-goalkeeper Malti.
Huma komplew fuq l-offensiva u, fil-65 minuta, kienu għoddhom skorjaw, meta minn azzjoni maħduma tajjeb ħafna, is-sostitut Jordi Alaez, li kien ilu biss ftit sekondi fil-ground, kellu x-xutt minn tarf il-kaxxa jintemm ftit barra.
Il-Maltin irrispondew fis-70 minuta meta Kemar Reid indirizza cross fid-direzzjoni ta’ Kyrian Nwoko li bir-ras ikkonkluda ftit barra.
Żewġ minuti wara, Andorra reġgħu resqu viċn li jiksbu l-goal tad-draw meta s-sostitut Ricard Fernandez ra t-tentattiv tiegħu salvat minn Bonello.
ANDORRA: 12-Iker Alvarez, 23-Biel Borra Font (9-Ricard Fernandez 64), 5-Max Llovera, 3-Marc Vales, 22-Bryan Olivera, 15-Moises San Nicolas (4-Erc Izquierdo 81), 18-Jesus Rubio (14-Jordi Alaez 64), 19-Joel Guillen (35-Joao Teixeira 35), 8-Eric Vales (6-Christian Garcia 81), 17-Joan Cervos, 11-Albert Rosas – Coach: Koldo Alvarez
MALTA: 1-Henry Bonello, 22-Zach Muscat, 5-Kurt Shaw, 2-Jean Borg, 15-Carlo Zammit Lonardelli, 7-Joseph Essien Mbong, 6-Matthew Guillaumier, 3-Ryan Camenuzli, 10-Teddy Teuma (20-Yannick Yankam 94), 14-Kyrian Nwoko (21-Paul Mbong 78), 11-Luke Montebello (9-Kemar Reid 60) – Coach: Michele Marcolini
REFEREE: Mohammed Al-Hakim (Svezja)
ASS. REFEREES: Mehmet Culum, Fredrik Klyver (Svezja)
RABA’ UFF: Joakim Ostling (Svezja)
SKORER: R. Camenzuli 45 (M)
AMMONITI: J. Guillen, A. Rosas (A), C. Zammit Lonardelli (M)
