Il-Pulizija għaddejja bit-tfittxija għall-ħallelin li lbieraħ daħlu jisirqu minn ħanut.
Il-każ seħħ ilbieraħ għall-ħabta tad-9.15p.m., minn ħanut li jinsab fi Triq Għajn Dwieli, Raħal Ġdid.
Il-Pulizija marret fuq il-post fejn minn stħarriġ preliminari jidher li żewġt irġiel mgħammdin u armati b’armi tan-nar, daħlu fil-ħanut u talbu l-flus lill-kaxxiera u klijent li kien fil-ħanut fil-ħin tas-serqa.
Iż-żewġt irġiel ħarbu minn fuq il-post wara li serqu ammont ta’ flus kontanti.
Il-klijent, raġel ta’ 26 sena residenti l-Kalkara kien iċċertifikat bi ġrieħi ħfief minn tabib miċ-Ċentru tas-Saħħa ta’ Raħal Ġdid, filwaqt li l-kaxxiera u ħaddiem ieħor li kienu fil-ħanut ma sofrewx ġrieħi.
Il-Pulizija għaddejja bit-tfittxija għall-ħallelin filwaqt li ġiet infurmata l-Maġistrat tal-Għassa Nadine Lia li fetħet inkjesta.
L-investigazzjonijiet b’rabta ma’ dan il-każ għadhom għaddejjin.
