Tyson Fury tilef bil-punti f’deċiżjoni maqsuma f’lejl drammatiku fl-Arabja Sawdija hekk kif Oleksandr Usyk sar l-ewwel champion tad-dinja tal-heavyweight b’erba’ ċintorini.
Il-Britanniku Fury kellu bidu ferm tajjeb fejn ingħata wkoll punti massimi iżda mal-ħin Usyk beda jżid il-prestazzjoni tiegħu, tant, li Fury ġie salvat mill-qanpiena fid-disa’ round.
Fi stennija mimlija tensjoni biex jinqraw l-iscorecards, Fury deher konvint mir-rebħa qabel ma Usyk beda jibki meta ġie kkonfermat bħala r-rebbieħ.
L-iscorecards kienu – 115-112 u 114-113 għall-Ukren, bit-tielet ġudikant jagħti 114-113 lil Fury.
Din kienet tfisser li Fury, 35 sena, tilef għall-ewwel darba f’karriera professjonali ta’ 16-il sena. Huwa se jikseb opportunità immedjata ta’ vendetta sportiva hekk kif se jerġgħu jiltaqgħu f’Ottubru li ġej.
“Nemmen li rebaħ ftit mir-rawnds, imma jien irbaħt il-maġġoranza,” qal Fury.
“Kienet waħda mill-aktar deċiżjonijiet ħorox fil-boxing.”
Usyk ħa ċ-ċinturin WBC mingħand Fury, biex żied mal-kollezzjoni tiegħu tal-WBA, WBO u IBF.
