Kien għall-ħabta tas-1.50am ta’ dalgħodu meta l-pulizija ġew imsejħa fid-diskoteka La Grotta li tinsab fil-limiti tal-Munxar f’Għawdex biex jassistu wara li kien hemm argument bejn diversi persuni.
Il-kelliem tal-Pulizija Brandon Pisani filwaqt li kkonferma ma’ dan is-sit li seħħ dan l-argument qal li b’kollox idaħħlu 3 persuni l-Isptar Ġenerali t’Għawdex, wieħed Għawdxi u tnejn barranin. Dan is-sit jinsab informat li l-barranin huma ta’ nazzjonalità Albaniża.
Fuq il-post mar tim mediku b’ambulanza li mill-ewwel bdew jagħtu l-ewwel għajnuna lil persuni nvoluti fil-ġlieda, u wara ttieħdu lejn l-Isptar Ġenerali t’Għawdex għal aktar kura.
Waqt dan l-argument l-Għawdxi intlaqat minn flixkun tal-ħġieġ u ġie ċċertifikat li qiegħed isofri minn ġrieħi gravi.
Wieħed mill-barranin ukoll ġie ċċertifikat li qiegħed isofri minn ġrieħi gravi filwaqt li l-ieħor sofra ġrieħi ħfief. Dan tal-aħħar qiegħed jinżamm mill-pulizija biex jgħin fl-investigazzjonijiet.
L-investigazzjonijiet tal-pulizija għadhom għaddejjin.
