360Sports huma l-imsieħba ewlenin ġodda tal-Malta Premier f’dak li huwa l-akbar ftehim tax-xorta tiegħu f’pajjiżna.
Il-ftehim, flimkien mal-arma ġdida tal-kampjonat, ġew żvelati lill-mezzi tax-xandir dalgħodu.
Il-ftehim ta’ tlett snin juri l-fiduċja li 360Sports għandhom fil-Malta Premier tant li għażlu din il-kompetizzjoni apposta biex jagħmlu l-ewwel ħarġa tagħhom bħala pjattaforma internazzjonali li toffri servizzi ta’ fan engagment fil-qasam sportiv.
Meta kkumenta fuq dan il-ftehim, ic-Chairman tal-Premier League Limited, Alan Abela qal li flimkien ma’ ftehim oħra, id-dħul mill-isponsorships tat-360Sports Malta Premier issa tela għal madwar €1 miljun, żieda ta’ 800%.
“Dan huwa vot ta’ fiduċja mill-komunita’ kummerċjali fl-attitudni, tmexxija u format ġdid tal-kampjonat. L-ixprun li wassal biex it-360Sports Malta Premier jirreġistra surplus sa’ mill-ewwel edizzjoni tiegħu huwa c-Chairman tal-MPL, Joseph Muscat, li ħadem ħafna biex jiġġenera dan l-interess kummerċjali nazzjonali u internazzjonali bla preċedent fil-football Malti,” qal is-Sur Abela.
Id-Direttur ta’ 360Sports Malta, Franz Josef Cauchi qal “Ninsabu onorati li sirna l-imsieħba prinċipali tal-aktar kompetizzjoni sportiva importanti fil-pajjiż. Dan huwa kampjonat bi storja imnaqqxa f’moħħ in-nies u b’ħafna supporters li qalbhom marbuta mal-logħba. Il-Kap Eżekuttiv tagħna, Nasib Piriyev kellu l-viżjoni li jagħmel minn Malta l-bażi ta’ dan il-proġett internazzjonali. Dan il-ftehim jimxi id f’id mal-missjoni tagħna li ntejjbu d-divertiment sportiv u l-involviment tas-supporters madwar id-dinja. Ninsabu ħerqana li naħdmu mal-Malta Premier League u l-clubs biex inwasslu esperjenzi ġodda u eċċitanti lis-supporters.”
Huwa żied: “Il-pjattaforma tagħna ta’ fan engagement se tkun qed ittejjeb l-esperjenza tal-football permezz ta’ kontenut, interazzjonijiet soċjali, logħob u informazzjoni. Din is-sħubija se televa l-mod kif is-supporters jgħixu l-loghba u se jwassal lil Malta Premier biex jilħaq quċċati ġodda fis-settur diġitali. Inħarsu ‘il quddiem biex nagħmlu impatt sinjifikanti fil-komunita’ sportiva Maltija.
Il-logo ta’ 360Sports ġie inkorporat fl-emblema l-ġdida tal-Malta Premier, li ntgħażlet wara sejħa pubblika, u li ġiet imbagħad addattata. Għall-ewwel darba, din l-emblema, li għandha l-falkun Malti fiċ-ċentru tagħha, se tintlibes fuq il-komma tal-flokkijiet ta’ kull team.
L-istaġun 2024/25 se jkun l-ewwel wieħed organizzat mill-Premier League Limited, kumpanija bi sħab bejn il-Malta Premier League u l-Malta Football Association. Dan se jkollu Opening u Closing Rounds bi playoffs u finali. Dan l-istaġun qed ikun ikkunsidrat bħala wieħed ta’ transizzjoni b’ aktar innovazzjonijiet li se jitwettqu matul iż-żmien.
Il-poloz tal-Openin Round ta’ 360Sports Malta Premier Opening Round se jitilgħu nhar l-Erbgħa li ġejjin.
