Il-laqgħa li kellha ssir illum bejn il-mexxej Awstrijak Karl Nehammer u l-mexxej Russu Vladimir Putin, jidher li bdiet, skont rapporti li waslu mill-midja Awstrijaka.
L-Awstrija — li mhix membru fi ħdan in-NATO, għal għexieren ta’ snin żammet relazzjoni diplomatika tajba mar-Russja.
Hija kontinwament għamlet l-almu tagħha biex tpinġi lilha nnifisha bħala medjatriċi bejn ir-Russja u l-pajjiżi Ewropej.
IKTAR KMIENI: Il-Kanċillier Awstrijak se jkun qed jiltaqa’ ma’ Putin f’Moska
Il-Kanċillier Awstrijak, Karl Nehammer, illum se jkun qed jivvjaġġa lejn Moska sabiex jiltaqa’ mal-President Russu Vladimir Putin. Nehammer huwa meqjus bħala l-ewwel mexxej Ewropew li se jiltaqa’ fiżikament mal-mexxej Russu minn mindu faqqgħet il-gwerra Russo-Ukrajna.
Uffiċjali Awstrijaċi qed jgħidu li permezz ta’ din il-laqgħa, Nehammer jixtieq jippromwovi taħditiet bejn Moska u Kyiv u se jkun qed jindirizza wkoll il-kwistjoni ta’ krimini tal-gwerra.
Nehammer nhar is-Sibt li għadda ltaqa’ mal-President Ukren Volodymyr Zelensky.
