Fl-aħħar diskors tiegħu bħala president ta’ Juventus, Andrea Agnelli, elenka l-kisbiet ta’ Juventus matul il-mandat tiegħu u ddefenda s-Super League
Id-diskors ta’ Agnelli fetaħ il-bord tad-diretturi tal-lum f’Turin. Huwa u l-membri tal-bord preċedenti, fosthom Maurizio Arrivabene u Pavel Nedved, kienu rriżenjaw fit-28 ta’ Novembru.
“L-ewwelnett irrid infakkar fil-captains ta’ Juventus li tlifna dan l-aħħar, Castano u Vialli. Nitlobkom tosservaw minuta silenzju,” qal Agnelli.
“Ma nistax naħbi l-emozzjoni tiegħi hekk kif kapitlu tal-istorja ta’ Juventus jispiċċa llum.”
Agnelli kien fost l-arkitetti tas-Super League fl-2021, flimkien mal-ġganti Spanjoli, Real Madrid u Barcelona, li għadhom formalment parti mill-kompetizzjoni. Ħafna mid-diskors tiegħu kien iffukat fuq l-istatus attwali tal-football u r-raġunijiet għaliex is-Super League kien meħtieġ.
“Rajna transizzjonijiet f’Chelsea, Milan, Newcastle, Atalanta u Leeds. Konsorzji bħal Chelsea, Milan ta’ RedBird, Newcastle ta’ PIF u Pagliuca għal Atalanta,” qal Agnelli.
“Qed nassistu għal fenomenu li qed jespandi bħal multi-proprjetajiet. CityGroup, RedBull u RedBird, 777.
“M’għandniex data ċerta, imma Goldman&Sachs qed jinvesti €1 biljun fil-football, hemm interess fis-settur.
“Għalija, il-Gvernaturi ma tawx tweġiba xierqa, ma evolvewx u ma jarawx id-differenza bejn il-logħba u n-negozju.
“Id-differenzi qed isiru aktar u aktar evidenti. Bħala membru tal-UEFA u president tal-ECA, l-analiżi kienet ċara. Is-sistema ma kinitx sostenibbli, u l-clubs kienu l-uniċi li ħadu r-riskji. Kien hemm diżaffezzjoni mill-partitarji u ħafna drabi ġejna kkritikati talli enfasizzajna dan, li qed isir ċar ukoll għal dawk li jimmaniġġjaw il-livell tan-’nofs’.
“Il-proposta tagħna kienet li noħolqu ekosistema għall-kampjonati ewlenin Ewropej biex tiżdied l-istabbiltà, filwaqt li jinżamm bilanċ bejn il-kompetizzjonijiet nazzjonali u Ewropej.
“Is-Serie A kellha biss 68 team minn meta saret kampjonat uniku kważi 100 sena ilu. Hija sistema miftuħa għal kulħadd ibbażata fuq il-kompetittività sportiva. Il-UEFA u l-ECA pproponewha fl-2019, imbagħad m’għandix għalfejn niftakar x’ġara. Kien hemm il-Covid-19 u ma rridx inmiss ma’ dik il-parti,” kompla jgħid Agnelli.
“Kieku ridt inżomm il-pożizzjoni privileġġata tiegħi bħala President tal-ECA, ma kontx nieħu ċerti deċiżjonijiet fl-2021. Il-football Ewropew jeħtieġ bidliet strutturali inkella l-Premier League se jiddomina għal ħafna snin.
“Ir-regolaturi attwali ma jridux jisimgħu dwar il-problemi tal-football. Huma jinsab f’pożizzjoni ta’ monopolju u nittama li l-Qorti Ewropea tirrikonoxxi l-pożizzjoni dominanti tal-UEFA.”
Agnelli kompla d-diskors tiegħu billi elenka l-kisbiet tal-club matul il-mandat tiegħu. It-team tal-kbar rebaħ 19-il trofew, it-team tan-Nisa ġie stabbilit fl-2017 u kompla jirbaħ ħames titli tas-Serie A konsekuttivi, fost trofej oħrajn.
Agnelli elenka wkoll l-eqreb kollaboraturi tiegħu, fosthom Fabio Paratici u Beppe Marotta u l-coaches kollha li impjega matul il-mandat tiegħu: Antonio Conte, Massimiliano Allegri, Maurizio Sarri u Andrea Pirlo.
Huwa żvela wkoll li kien se jieħu pawsa meta jwarrab bħala membru tal-bord ta’ Exor u Stellantis, ‘bi qbil’ ma’ kuġinuh John.
Gianluca Ferrero se jkun ikkonfermat formalment bħala l-president ta’ Juventus illum, filwaqt li Maurizio Scanavino diġà qed jaħdem bħala l-Kap Eżekuttiv il-ġdid tal-club.