Anzjan sofra minn ġrieħi gravi wara li lbieraħ filgħodu għall-ħabta tad-9:15 a.m kien involut f’inċident tat-traffiku li seħħ fi Triq il-Wied fiż-Żurrieq.
Minn stħarriġ illi sar irriżulta li kienet seħħet ħabta bejn Ford Fiesta; misjuqa minn żagħżugħa ta’ 21 sena residenti s-Siġġiewi, u Toyota Belta, misjuqa mill-anzjan ta’ 74 sena residenti Ħal Qormi.
Ir-raġel ingħata l-għajnuna minn tim mediku u ttieħed l-Isptar Mater Dei b’ambulanza.
L-investigazzjonijiet tal-Pulizija għadhom għaddejjin.