“Persuni li jkunu jridu jirtiraw se nagħtuhom ċ-ċans li jkunu jistgħu jibqgħu jgħallmu s-sengħa tagħhom u jieħdu kumpens ta’ hekk, waqt li jieħdu l-pensjoni.”
Sostna dan il-Prim Ministru Robert Abela hekk kif kien qed jindirizza l-ftuħ tal-konferenza Nazzjonali ta’ Property Malta li fiha nħareġ ukoll it-tmien edizzjoni tar-rapport dwar l-industrija tal-kostruzzjoni u s-suq tal-propjetà.
Fil-fatt, il-Prim Ministru sostna kif dan ir-rapport jiffoka fuq tliet temi li jaqblu perfettament mal-prijoritajiet li qed imexxi l-Gvern, jiġifieri kwalità fis-settur tal-kostruzzjoni, viżjoni strateġika u t-tnaqqis tal-iskariġġ fuq in-nies u l-effetti negattivi li jista’ jġib miegħu l-iżvilupp.
Il-Prim Ministru rrimarka mill-ġdid l-importanza tal-ekonomija li twassal għall-kwalità u għalhekk ir-riformi li beda jimplimenta l-Gvern fosthom fil-qasam tal-kostruzzjoni.
Qal li t-tkabbir ekonomiku għandu jkompli jasal mhux għal sempliċi tkabbir imma biex b’dak it-tkabbir intejbu l-kwalità tal-ħajja tan-nies.
“Insemmi biss biss l-introduzzjoni ta’ liċenzji għall-kuntratturi. Qabel din ir-riforma kulħadd seta’ jaqbad u jidħol għal xogħol ta’ żvilupp,” sostna l-Prim Ministru hekk kif aċċenna wkoll għall-introduzzjoni tal-iskill card għall-ħaddiema li jaħdmu fl-istess industrija.
Kien hawn li l-Prim Ministru sostna iżda l-prijorità mill-ġdid li dan il-Gvern qed jagħti l-isnajja’ u l-miżura li permezz tagħha aktar persuni se jkunu jistgħu jikkontribwixxu biex jgħallmu l-isnajja’ lill-ġenerazzjonijiet iżgħar filwaqt li jkunu kkumpensati għalih.
“Imbagħad bħala Gvern nemmnu li s-settur tal-bini jrid ikun katalista tal-bidla ambjentali,” tenna wkoll il-Prim Ministru hekk kif irrimarka wkoll li l-Gvern diġà jagħti għajnuniet f’dan ir-rigward. Iżda Dr Abela sostna wkoll li jrid ikun hemm aktar inċentivi biex tiżdied id-domanda għal ċertu tip ta’ propjetajiet.
“Propjetajiet ta’ kwalità aktar għolja u li biex isiru jirrikjedu bidla fil-mod kif topera l-industrija tal-bini. Aħna nixtiequ li aktar mill-attività fis-settur tiffoka fuq rinnovar ta’ proprjetà ħalli nersqu aktar qrib il-miri ambjentali tagħna. Irridu li minflok jinbnew aktar appartamenti, id-domanda tkun għal proprjetà eżistenti jew propjetajiet b’estetika tradizzjonali,” tenna l-Prim Ministru.
Fi tmiem id-diskors tiegħu, il-Prim Ministru rrimarka li biex pajjiżna jwettaq b’suċċess il-qabża għall-kwalità, irridu industrija tal-bini differenti minn dik tal-lum, b’ħiliet aktar avvanzati fost oħrajn.
