Birkirkara rebħu l-ewwel unur tal-istaġun wara li kisbu l-Assikura Women’s Super Cup, b’rebħa ta’ 2-0 fuq Swieqi United fis-Centenary Stadium.
L-Istripes kisbu s-sitt Super Cup tagħhom grazzi għall-gowls fl-ewwel taqsima minn Ann-Marie Said u Sara Saliba hekk kif qed ikomplu jżidu aktar trofej fil-kabinett tagħhom.
Din kienet l-ewwel edizzjoni tas-Super Cup tan-Nisa mill-2019 wara l-pandemija tal-Covid-19 li waqqfet il-pjanijiet għall-aħħar żewġ edizzjonijiet ta’ dan it-trofew.
Għal din il-logħba, il-kowċ ta’ Birkirkara Jose Borg utilizza formazzjoni b’saħħitha fosthom l-attakkant Saliba li skorjat iż-żewġ gowls tar-rebħa kontra Swieqi u Mġarr United fil-ħarġiet riċenti tagħhom fil-kampjonat.
Is-Swieqi, min-naħa tagħhom, skjeraw ukoll il-plejers soliti tagħhom fosthom il-midfielder Shona Zammit li qabel il-partita ġiet ippreżentata bl-unur tal-Plejer tax-Xahar Assikura.
Fl-istadji tal-ftuħ tal-logħba, iċ-ċansijiet kienu ftit biż-żewġ naħat jagħmlu ċert li jsibu lr-ritmu tajjeb fil-partita.
Birkirkara fetħu l-iskor fit-18-il minuta meta l-goalkeeper ta’ Swieqi Cynthia Konlan naqset milli tikkontrolla freekick ta’ Ann-Marie Said.
It-tim immexxi minn Jose Borg resaq viċin li jirdoppja meta Veronique Mifsud ikkonnettjat min freekick ta’ Said iżda ġiet imċaħħda mill-wieqfa.
Ir-risposta ta’ Swieqi waslet permezz ta’ Dorianne Theuma li kellha żewġ xuttijiet kosnekuttivi li t-tnejn ġew imblukkati minn Janice Xuereb.
L-attakkant Fernanda Peinado ttestjat lil Xuereb b’daqqa ta’ ras minn ġewwa l-kaxxa iżda l-goalkeeper ta’ Birkirkara kienet attenta biex evitat kull periklu.
Minkejja dan, Birkirkara rduppjaw l-iskor ftit qabel il-mistrieħ permezz ta’ Sara Saliba biex kompliet tistabbilixxi ruħha bħala plejer ewlenija tal-Istripes.
Fi tmiem il-partita, il-president tal-Malta FA Bjorn Vassallo flimkien mad-Direttur Maniġerjali ta’ Assikura Andrew Grech ippreżentaw il-midalji u t-trofew lil Birkirkara FC.
Birkirkara: Xuereb; G. Zahra (63 I. Farrugia), A. Said, S. Farrugia, A. Sultana, R. Giusti, V. Mifsud, C. Zammit, M. Grosso, M. Cardona, S. Saliba (90 M. Fenech ).
Swieqi U.: Konlan; J. Dimech, D. Theuma, J. Flask, E. Xuereb, F. Peinado, S. Zammit, R. Mendoza, J. Vella Turner (84 M. Sciberras), J. Schembri, R. Atinga.
Referee: Paula Buttigieg
