Charles Leclerc beda b’mod mill-aqwa tmiem il-ġimgħa tal-Grand Prix tal-Belt tal-Messiku wara li temm fl-ewwel post fiż-żewġ sessjonijiet tal-provi liberi fiċ-ċirkwit ta’ Autodromo Hermanos Rodriguez.
Is-sewwieq ta’ Ferrari rreġistra l-aħjar ħin tiegħu ta’ minuta u 17.827 sekonda fit-tieni sessjoni, biex spiċċa 0.103 sekondi qabel Lando Norris tal-McLaren. George Russell tal-Mercedes temm fit-tielet post, 0.003 sekondi oħra warajh.
Leclerc kien diġà stabbilixxa l-aħjar ħin fl-ewwel sessjoni b’minuta u 18.128 sekonda.
Kimi Antonelli temm fir-raba’ post fit-tieni sessjoni, qabel Max Verstappen.
Is-sessjoni kellha titwaqqaf temporanjament wara ħabta bejn Verstappen u Liam Lawson, filwaqt li Lewis Hamilton kellu jieqaf minħabba problema relatata mal-power unit.
