Ġewwa l-Korea ta’ Fuq, għadd ta’ persuni li huma intiżi sew fit-tekonoloġija qegħdin “ibagħbsu” s-sistema li tiġi installata fuq kull smartphone mibjugħ ġewwa dan il-pajjiż li xogħolha hu li tipprojbixxi liċ-ċittadini milli jaċċessaw midja ta’ pajjiżi barranin.
Fil-Korea ta’ Fuq, dawk il-persuni li jużaw l-ismartphones ma jkunux jistgħu jniżżlu applikazzjonijiet minn is-servizzi ta’ Google jew Apple kif nagħmlu aħna, u għalhekk dawn huma sfurzati jużaw biss applikazzjonijiet u mezzi oħrajn ta’ propaganda li huma approvati mill-istat.
Kull telefown ċellulari mibjugħ f’dan il-pajjiż jiġi b’applikazzjonijiet li josservaw il-mod ta’ kif qiegħed jiġi użat l-apparat u jieħdu ritratti għal għarrieda tal-iscreen tal-utent. Dawn ir-ritratti jiġu maħżuna f’post fejn ma jkunux jistgħu jiġu mħassrin.
Iżda issa jidher li numru żgħir ta’ persuni qed jirnexxilhom jevitaw din il-protezzjoni u b’hekk issa jistgħu jaċċessaw informazzjoni minn madwar id-dinja. Rapport li ħareġ dwar dan jgħid li żewġ persuni li rnexxielhom jaħarbu mill-Korea ta’ Fuq ikkonformaw li dan qiegħed isir.
Għalissa jidher li din il-ħaġa qiegħda ssir minn numru żgħir ta’ persuni iżda hu mifhum li l-awtoritajiet Koreani jinsabu mħassba ferm dwar dak li qiegħed jiżviluppa. Il-Korea ta’ Fuq huwa pajjiż magħluq u dħul ta’ informazzjoni barranija li kapaċi tbiddel il-mentalità taċ-ċittadini tbeżża’ ħafna lill-mexxejja tal-pajjiż.
