L-attakkant Portugiż, Cristiano Ronaldo, sostna li kellu “ħafna opportunitajiet” biex jiffirma mal-aqwa clubs qabel ingħaqad ma’ dak tal-Arabja Sawdija, Al-Nassr.
Huwa qal dan waqt konferenza tal-aħbarijiet qabel ma ġie ppreżentat b’mod uffiċjali.
Huwa ngħaqad ma’ Al Nassr bħala player ħieles, nhar il-Ġimgħa, wara li ħalla lil Manchester United wara intervista kontroversjali li fiha kkritika lill-club u dak kollu ta’ madwaru.
Il-player ta’ 37 sena qal li kellu offerti minn clubs mill-Brażil, mill-Awstralja, mill-Istati Uniti u mill-Portugall.
“Fl-Ewropa l-ħidma tiegħi hija lesta,” huwa qal.
“Irbaħt kollox … lgħabt mal-iktar clubs importanti fl-Ewropa u issa din hija sfida ġdida fl-Asja.”
Ronaldo huwa rrappurtat li se jirċievi l-akbar salarju fl-istorja tal-football ta’ aktar minn €175 miljun fis-sena fi ftehim li jdum sal-2025.
“Kif ħadd ma jaf, issa nista’ ngħid li kelli ħafna opportunitajiet fl-Ewropa … minn ħafna clubs fil-Brażil, l-Awstralja, l-Istati Uniti, anke fil-Portugall,” qal Ronaldo lill-ġurnalisti.
“Iżda tajt kelmti lil dan il-club għall-opportunità li niżviluppa l-football u l-partijiet kollha affaxxinanti ta’ dan il-pajjiż.”
Ronaldo ntlaqa’ b’applaws u għajjat taċ-ċelebrazzjoni tal-marka tiegħu ‘Siu’ waqt li kien qed jitkellem. Huwa wieġeb mistoqsijiet minn uffiċjal tal-club iżda ma ħa l-ebda mistoqsija mingħand il-ġurnalisti.
