Il-Pollakk ta’ 27 sena li lbieraħ ġie arrestat b’rabta mal-mewt ta’ raġel Marokkin li nstab mejjet fi Ġnien Spinola f’San Ġiljan, se jitressaq il-Qorti dalgħodu.
Il-każ seħħ ilbieraħ meta, għall-ħabta tas-6.30am, il-Pulizija kienu infurmati li kien hemm raġel li allegatament kien bla ħajja fil-Ġnien Spinola, San Ġiljan.
Il-Pulizija marru immedjatament fuq il-post fejn ġie kkonfermat ir-rapport. Minnufih bdew l-investigazzjonijiet fejn irriżulta li ftit tal-ħin qabel, allegatament kien seħħ argument bejn il-vittma, Marokkin ta’ 31 sena u l-allegat aggressur, Pollakk ta’ 27 sena.
Irriżulta li l-Pollakk telaq minn fuq il-post iżda wara tfittxija intensiva u permezz ta’ filmati li nġabru, huwa ġie arrestat fl-akwati tal-Bajja ta’ San Ġorġ, madwar siegħa u nofs biss wara.
Il-Maġistrat Dr. Joe Mifsud LL.D. kien infurmat bil-każ u fetaħ inkjesta, mgħejjun minn diversi esperti.