Iż-żewġ timijiet mill-istess lokalita’ iġifieri Ħamrun Bayern A u Ħamrun Education Bar telgħu fl-ewwel post tal-klassifika tal-kampjonat tal-Ewwel Diviżjoni tad-darts meta rebħu l-logħbiet importanti tagħhom.
Ħamrun Education Bar kellhom wirja kbira kontra Floriana Ajax A tant li rebħulhom 5-3. Kienet logħba ferm bilanċjata biż-żewġ naħat li alternaw il-vantaġġ tagħhom fejn sa tmiem is-sitt game l-iskor kien 3-3.
Madankollu l-Ħamruniżi rebħu ż-żewġ games deċiżivi sabiex ħadu tliet punti ferm importanti għall-għanijiet tagħhom.
Ħamrun Bayern A għelbu lit-tieni tim tagħhom Ħamrun Bayern B 6-2. Ir-rebħa qatt ma kienet fid-dubju għat-tim A li fetaħ vantaġġ tajjeb u baqa’ konsistenti sat-tim.
F’logħba ferm interessanti, Fgura Kenky ġew miżmuma fi draw ta’ 4-4 kontra Sliema Inter Darts Club. Dawn tal-aħħar minkejja li mhux dejjem qed ikunu konsistenti fil-logħob tagħhom, ipproduċew wirja tajba kontra l-Fgurin sabiex ħadu punt importanti.
Anke Manchester Conquest Pub daħlu biċ-ċans li jkomplu jissieltu għar-rebħ tal-unuri wara rebħa tajba ta’ 6-2 kontra Marsa Top Gun.
Mill-kampjonat tat-tieni diviżjoni, Beland Żejtun irreġistraw ir-raba’ rebħa staġjonali wara li għelbu lil Fgura Maypole 6-2 filwaqt li PO’s Bar Gudja resqu viċin il-leaders Birżebbuġa Lions wara rebħa ta’ 5-3 kontra Mqabba Tal-Ġilju.
It-tielet diviżjoni qed jiżvolġi wkoll f’kampjonat ferm interessanti bil-leaders jibqgħu Birgu Boċċi Club li ma sabuhiex daqshekk faċli jirbħu lil Leah’s Bar 5-3.
Juventutis Domus baqgħu żewġ punti bogħod mill-Ġirbin wara li ftit sabu diffikulta’ sabiex jegħlbu lil Mqabba 7-1 bi Duke’s Bar A li għelbu lit-tieni tim tagħhom Duke’s Bar B bl-istess skor.
