Il-President ta’ Como, Mirwan Suwarso, flimkien ma’ diversi diretturi tal-club, iddeċidew li jċedu l-biljetti tagħhom għad-debutt storiku ta’ Como fil-UEFA Champions League sabiex jagħtu ċ-ċans lil partitarji anzjani jattendu l-logħba.
Como se jilagħbu kontra RB Leipzig il-Ħamis filgħaxija, wara li kisbu kwalifikazzjoni għall-kompetizzjoni Ewropea għall-ewwel darba fl-istorja ta’ 119-il sena tal-club. Is-suċċess wasal wara li spiċċaw fir-raba’ post fis-Serie A l-istaġun li għadda taħt it-tmexxija ta’ Cesc Fabregas.
Id-domanda għall-biljetti kienet ferm akbar mill-kapaċità ta’ Stadio Giuseppe Sinigaglia, li normalment jakkomoda madwar 12,000 spettatur. Minħabba rekwiżiti tal-UEFA relatati max-xandir u l-operat tal-logħba, il-kapaċità tnaqqset b’1,000 siġġu.
Suwarso qal li hu u membri oħra tal-club se jċedu posthom biex jingħataw lil partitarji li ilhom isegwu lil Como għal ħafna snin, partikolarment dawk imwielda fl-1950 jew qabel.
Como għaddew minn trasformazzjoni notevoli, wara snin f’diviżjonijiet inferjuri u żewġ fallimenti finanzjarji. Fl-2024 irritornaw fis-Serie A wara 21 sena, u fl-istaġun li għadda kisbu post fost l-aqwa erba’ timijiet tal-Italja.
Fil-kampanja Ewropea tagħhom se jiltaqgħu wkoll ma’ Feyenoord, Manchester United, Lens, AEK Athens, Real Betis, Paris Saint-Germain u Barcelona.
