Kolumbjan ta’ 32 sena, li jaħdem bħala DJ, baqa’ jinżamm arrestat wara li ġie mixli bi stupru fuq tfajla f’residenza f’Paceville.
Il-Qorti semgħet kif il-vittma kienet marret għand il-pulizija biex tirrapporta l-allegat każ imbikkma. Hija qaltilhom li wara li kienet talbet lid-DJ idoqqilha diska, l-imputat allegatament kien sfurzaha biex tmur id-dar tiegħu. Fil-Qorti ntqal ukoll li fil-ġurnata ta’ wara, l-imputat kien kellem lill-vittma fuq Instagram fejn skuża ruħu magħha għal dak li ġara.
L-imputat, li ismu mhux jixxandar fuq ordni tal-Qorti, wieġeb mhux ħati tal-akkużi miġjuba kontrieh u saret talba għall-ħelsien mill-arrest tiegħu.
Il-Prosekuzzjoni oġġezzjonat għal din it-talba minħabba li l-vittma għad trid tixhed f’dawn il-proċeduri u peress li l-imputat ma kellu l-ebda rabtiet ma’ Malta.
Min-naħa tagħha, id-Difiża argumentat li l-imputat “m’għandux jiġi diskriminat minħabba li huwa barrani” u li l-vittma diġà xehdet fl-inkjesta.
Kien hawn fejn il-Prosekuzzjoni qalet li l-mara kienet wieġbet biss għal xi mistoqsijiet relatati mal-eżami mediko-legali u ma tatx rendikont sħiħ ta’ dak li ġara. “Din il-verżjoni lanqas biss ma hi maħlufa,” qalet il-Prosekuzzjoni.
Wara li semgħet iż-żewġ naħat, il-Qorti preseduta mill-Maġistrat Nadine Lia, ċaħdet it-talba għall-ħelsien mill-arrest, minħabba l-fatt li l-vittma għadha trid tixhed u minħabba l-biża’ ta’ intralċ ta’ provi.
Il-Prosekuzzjoni tmexxiet mill-Ispetturi John Spiteri u Brian Xuereb. F’isem l-Uffiċċju tal-Avukat Ġenerali dehret l-Avukat Darlene Grima.
L-imputat qed ikun assistit mill-Avukati Rachel Tua u Edmund Cuschieri. L-Avukat Alfred Abela qed jidher parte civile għall-vittma.
