PORTUGALL…………….. 2
REPUBBLIKA ĊEKA……. 1
F’partita li ma laħqitx l-aspetattivi mixtieqa, il- Portugall għelbu lir-Repubblika Ċeka bl-iskor ta’ 2-1 liema goal tar-rebħa wasal fil-ħin miżjud.
L-ewwel azzjoni denja ta’ nota waslet fis-seba’ minuta meta Rafael Leao xeħet cross lejn Cristiano Ronaldo li kien ġej bil-ġirja iżda ma laqatx tajjeb il-ballun.
Forsi dan l-attakk ta indikazzjoni li l-partita kienet se tkun waħda missielta iżda ċ-Ċeki għażlu li jingħalqu fil-qoxra difensiva u japplikaw it-tattika ta’ konteniment filwaqt li joperaw bil-kontrattakki.
Fl-20 minuta, il-Portugiżi resqu viċin meta Diogo Dalot xeħet cross insidjuż fejn Ronaldo ma rnexxielux jagħmel kuntatt mal-ballun iżda daħal Bruno Fernandes u d-daqqa ta’ ras tiegħu ġiex imxellfa f’corner.
Fit-23 minuta, Ruben Diaz avvanza bil-ballun u peress li kellu l-ispazju neċessarju għażel li jixxuttja minn barra l-kaxxa liema tentattiv ġie mdawwar f’corner.
Fil-25 minuta, waslet l-aħjar azzjoni tal-Portugall meta Fernandes ħarab fuq il-faxxa leminija u xeħet cross fil-baxx fejn Leao kien ġej bil-ġirja iżda ma laqatx il-ballun bi ftit millimetri biex naqas milli jixħet il- ballun fix-xibka.
Peró, fit-32 minuta Ronaldo seta’ fetaħ l-iskor meta ġie żmarkat minn Fernandes iżda waħdu quddiem Jindrich Stanek ra lill-goalkeeper Ċek jilqa’ t-tentattiv tiegħu.
Minuta qabel tmiem l- ewwel taqsima, Stanek wettaq save kbir fuq Ronaldo li rċeiva mingħand Leao minn azzjoni ta’ corner.
It-tieni taqsima fetħet b’attakk taċ-Ċeki li fih Patrik Schick falla l-mira biex sa dak il-ħin kienu għadhom ma nkwadrawx il-lasti avversarji.
Fil-56 minuta, Ronaldo kien għoddu fetaħ l-iskor mill-cross ta’ Ruben Dias iżda ġie antiċipat fil-ħin minn Tomas Soucek.
Tliet minuti wara, Stanek laqa’ l-free-kick b’saħħtu iżda ċentrali mogħti minn Ronaldo.
U proprju fl-ewwel xutt lejn il-lasti, li wasal fit-62 minuta, iċ-Ċeki fetħu l-iskor b’xutt ta’ Lukas Provod minn tarf il-kaxxa wara żball fid-difiża Portugiża.
Peró, tmien minuti wara, il-Portugall kisbu d-draw meta mill-cross ta’ Diogo Jota, Nuno Mendes xeħet bir-ras lejn il-lasti fejn Stanek laqa’ parzjalment iżda l-ballun ħabat mad-difensur, Robin Hranac, u spiċċa fix-xibka.
Fis-86 minuta, il-Portugiżi ħasbu li skorjaw il-goal tar-rebħa meta Diogo Jota xeħet fix-xibka bir-ras iżda l-goal ma ġiex konvalidat mill-VAR hekk kif Ronaldo kien f’pożizzjoni millimetrika ta’ offside.
Peró, fit-93 minuta, huma skorjaw il-goal tar-rebħa minn Francisco Conceicao li approfitta minn żball ta’ Ladislav Krejci.
