Is-sewwieq Olandiż tal-Formula Wieħed, Max Verstappen (Red Bull) – ritratt – illum se jibda mill-ewwel pożizzjoni fil-Grand Prix tal-Awstrija, li se jsir fir-Red Bull Ring, fil-belt ta’ Spielberg, meta kiseb l-aħjar ħin fil-provi uffiċjali, dak ta’ minuta u 4.686 sekondi.
B’hekk din hija t-tmien pole postion ta’ Verstappen f’dan l-istaġun minn 11-il tiġrija.
Mit-tieni u mit-tielet postijiet se jibdew iż-żewġ sewwieqa tal-McLaren, il-Britanniku Lando Norris u l-Awstraljan Oscar Piastri, li se jkunu segwiti mill-Britanniku George Russell (Mercedes), l-Ispanjol Carlos Sainz (Ferrari) u l-Britanniku Lewis Hamilton (Mercedes) li kompla jiddiżappunta.
L-aħħar pole position li kiseb Verstappen kienet erba tiġrijiet ilu, dik ta’ Emilia Romagna.
Huwa esprima s-sodisfazzjon tiegħu li se jibda mill-post fejn qal: “Ninsab ferm kuntent li se nibda mill-ewwel pożizzjoni.
“Ippruvajna naġġustaw il-karozza u naħseb li marret tajjeb ħafna. Il-korsa kienet daqsxejn aktar sħuna milli kienet il-Ġimgħa li għamlitha daqsxejn diffiċli biex insuq iżda l-karozza ħassitha ħafna aħjar għalija.”
Il-klassifika (ta’ fuq) hija: 227 – Max Verstappen; 156 – Lando Norris; 150 – Charles Leclerc; 120 – Carlos Sainz; 112 – Sergio Perez; 94 – Oscar Piastri.
