Minn Cristian Muscat
Wara li fi tmiem il-ġimgħa li għadda ntemm il-kampjonat fejn Hamrun Spartans ġew inkurunati champions, l-attenzjoni ddur fuq iż-żewġ semi-finali tal-FA Trophy li se jintlagħbu llum u għada biex jiġu deċiżi l-finalisti li jaffrontaw lil xulxin nhar il-Ħadd li ġej biex b’hekk jinżel is-siparju għal dan l-istaġun.
Iż-żewġ semi-finali huma mill-aktar interessanti, bil-holders Birkirkara għandhom konfront mill- aktar diffiċli kontra Sliema Wanderers filwaqt li Floriana jimmiraw li jagħmlu vendetta sportiva kontra Gzira United.
Floriana v Gzira U. – Din hija partita mill-aktar delikata għal Floriana li se jilagħbu kontra team li rebħilhom darbtejn fil-kampjonat, bl-aħħar waħda tkun proprju nhar il-Ġimgħa li għadda, bl-iskor ta’ 3-1, biex aċċertaw posthom fl-ogħla diviżjoni.
Wara kampjonat mill-aktar diżappuntanti li fih ikkrollalhom kollox lejn it-tmiem, il-Greens jimmiraw li jkunu l-aktar club li jirbaħ dan l-unur hekk kif bħalissa jinsabu jgawdu l-quċċata ma’ Sliema Wanderers … b’21 suċċess.
Biex waslu sa dan l-istadju, Floriana eliminaw lil Naxxar 2-0 fit-tieni round, lil Zebbug Rangers 7-0 fit-tielet round u lil Marsaxlokk 2-0 fil-kwarti-finali.
Il-Maroons komplew javvanzaw b’rebħiet fuq Fgura United 2-0 fit-tieni round, Hibernians 1-0 fit-tielet round u fuq Mgarr United 2-0 fil-kwarti-finali.
Din se tkun it-tielet darba li dawn iż-żewġ timijiet se jiltaqgħu f’din il-kompetizzjoni fejn fit-tnejn preċedenti Floriana ħarġu rebbieħa bl-iskor identiku ta’ 2-0.
Birkirkara v Sliema W. – Dan huwa konfront miftuħ għal kull riżultat bejn żewġ timijiet li jridu jagħlqu l-istaġun fuq nota għolja.
Interessanti huwa l-fatt li coach ta’ Sliema Wanderers Paul Zammit, huwa missier l-attakkant ta’ Birkirkara, Andrea. Min minnhom se joħroġ rebbieħ?
Biex waslu sa din is- semi-finali, Birkirkara rebħu lil Attard 3-1 fit-tieni round, lil Sirens 1-0 wara l-ħin barrani fit-tielet round u lil Hamrun Spartans 4-3 bl-għoti tal-penalties wara draw ta’ 2-2 fil-kwarti-finali.
Il-Wanderers kellhom passaġġ simili meta għelbu lil Marsaskala 3-0 fit-tieni round, lil Balzan 1-0 wara l-ħin barrani fit-tielet round u lil Mosta 4-3 bl-għoti tal-penalties wara draw ta’ 2-2 fil-kwarti-finali.
Din se tkun l-20 logħba bejniethom fejn f’dawk preċedenti, il-Slimiżi rebħu 9, il-Karkariżi rebħu 5 … bil-ħames partiti l-oħra jintemmu fi draws.
L-uniku player sospiż huwa l-midfielder ta’ Birkirkara, Ali Diakite.
