L-Assoċjazzjoni tal-Isport Akwatiku ta’ Malta (ASA Malta) ħatret lil Dimitris Athymaritis bħala d-Direttur Tekniku l-ġdid tal-Assoċjazzjoni għall-Għawm, b’effett mill-1 ta’ Settembru 2026, għal perjodu inizjali ta’ tliet snin.
Fir-rwol il-ġdid tiegħu, Athymaritis se jmexxi l-iżvilupp u l-implimentazzjoni ta’ Programm Nazzjonali tal-Għawm unifikat li jkopri kull livell, mit-tagħlim bażiku tal-għawm (Learn-to-Swim) sal-livell tal-elite, filwaqt li jaħdem mill-qrib mal-kowċis tal-klabbs affiljati kollha.
Huwa se jservi wkoll bħala Kowċ Nazzjonali tal-Għawm f’kompetizzjonijiet internazzjonali, fejn jissorvelja l-għażla u t-tħejjija tal-għawwiema eliġibbli, u se jkun responsabbli għall-ippjanar tal-prestazzjoni u l-valutazzjoni kontinwa tal-għawwiema fi ħdan il-programm tal-elite u l-programm ta’ żvilupp u progressjoni għall-atleti żgħażagħ (Junior Development Progression Programme).
Athymaritis iġib miegħu aktar minn tliet deċennji ta’ esperjenza fil-kowċing mill-Greċja, fejn ħadem ma’ klabbs fosthom Ethnikos Piraeus SC, N.O. Patron SC, A.N.O. Argyroupolis SC, u Ilyssiakos SC. Mill-2015 ’l hawn, huwa serva bħala Kowċ tal-Federazzjoni Nazzjonali responsabbli mill-Programm ta’ Żvilupp tal-Għawwiema tal-Elite tal-Greċja, wara li preċedentement okkupa r-rwol ta’ Kowċ tal-Federazzjoni Nazzjonali bejn l-1998 u l-2000.
Għawwiema taħt il-gwida tiegħu rrappreżentaw lill-Greċja fil-Kampjonati Ewropej (kemm dawk tas-seniors kif ukoll tal-juniors), fil-Logħob tal-Mediterran u fil-Kampjonati tad-Dinja, u kkompetew f’erba’ edizzjonijiet konsekuttivi tal-Logħob Olimpiku: Londra 2012, Rio 2016, Tokyo 2021 u Pariġi 2024. Huwa serva wkoll bħala Supervisor tal-‘Competition Zone’ waqt il-Logħob Olimpiku ta’ Ateni fl-2004.
Huwa għandu lawrja (Bachelor’s Degree) fl-Edukazzjoni Fiżika u x-Xjenza tal-Isport minn TEFAA Ateni, fejn iggradwa b’distinzjoni u speċjalizzazzjoni fl-għawm, u temm kors fil-Fiżjoloġija tal-Eżerċizzju fl-Iskola tal-Mediċina tal-Università ta’ Stanford. Huwa membru tal-World Swimming Coaches Association (WSCA), tal-American Swimming Coaches Association (ASCA) u tal-Australian Swimming Coaches & Teachers Association (ASCTA), u ta lekċers u taħriġ estensiv fi programmi ta’ edukazzjoni għall-kowċis, inkluż bħala lekċerer mistieden f’TEFAA Ateni u bħala għalliem fl-Iskola Griega tal-Kowċis tal-Għawm.
“Ninsabu kuntenti ħafna li nilqgħu lil Dimitris Athymaritis fl-Assoċjazzjoni tal-Isport Akwatiku ta’ Malta (ASA Malta),” qal Karl Izzo, il-President tal-ASA Malta. “L-esperjenza vasta tiegħu fil-kowċing internazzjonali u r-riżultati ppruvati li kiseb fl-iżvilupp ta’ għawwiema sal-livell Olimpiku jagħmluh il-persuna ideali biex imexxi l-fażi li jmiss tal-Programm Nazzjonali tal-Għawm tagħna. Nistennew bil-ħerqa li naħdmu mill-qrib miegħu hekk kif inkomplu ngħollu l-istandard tal-iżvilupp tal-għawm fil-klabbs kollha tagħna.”
L-ASA Malta tistenna bil-ħerqa l-kollaborazzjoni ta’ Athymaritis mal-kowċis tal-klabbs, hekk kif l-Assoċjazzjoni taħdem lejn approċċ unifikat u bbażat fuq id-dejta għall-iżvilupp tal-atleti f’kull livell, mit-tagħlim bażiku tal-għawm sal-kompetizzjoni tal-ogħla livell (elite).
