Godfrey Leone Ganado nstab ħati talli ppubblika kliem ta’ tixwix u mibgħeda fil-konfront tal-Prim Ministru u anke tal-eks Prim Ministru u anke kontra dawk li jappartjenu lil Partit Laburista.
Kien l-Avukat Daniel Attard li kien għamel kwerela fil-konfront ta’ Ganado għand il-Kummissarju tal-Pulizija.
Il-Maġistrat Jean Paul Grech hekk kif staqsa lil Ganado jekk iweġibx ħati jew le, l-akkużat qallu “minn hawn u ħames minuti oħra se nispiċċa fuq ONE”. Kien hawn li l-Maġistrat Grech qallu li hu kien staqsa biex jgħid iva jew le u xejn aktar minn hekk.
F’isen Ganado, l-avukat Kris Busietta qal li l-klijent tiegħu mhux se jibqa’ jikteb kummenti fuq il-midja soċjali “biex ma niġix miżinterpretat.”
Il-Maġistrat tah il-libertà kundizzjonata u li ma jagħmilx reat ieħor fi żmien disa’ xhur u jekk jagħmel dan jerġa’ jinfetaħ il-każ. Hu ġie mmultat ukoll 250 ewro.
