Il-finali tal-Laferla Men’s Trophy tal-futsal, li se tintlagħab nhar il-Ġimgħa 29 ta’ Mejju, se toffri partita storika bejn żewġ realtajiet differenti tal-futsal Malti hekk kif Malta Futsal U19, rebbieħa tal-Challenge League, se jaffaċċjaw lil Luxol St Andrews FC Futsal fil-ġlieda għat-trofew.
It-tim tal-U19 kien wieħed mill-aktar timijiet impressjonanti tal-istaġun u issa jinsab quddiem l-akbar test tiegħu kontra wieħed mill-aktar klabbs stabbiliti fil-futsal Malti. Għall-iskwadra żagħżugħa, din hija opportunità unika biex tkompli tikteb l-istorja tagħha u turi li kapaċi tikkompeti mal-aqwa timijiet tal-pajjiż.
Fil-mixja tagħhom lejn il-finali, Malta Futsal U19 kisbu rebħa dominanti ta’ 4-0 fis-semi-finali kontra Malta FA Futsal Selection U17 sabiex jassiguraw post fil-finali.
Min-naħa tagħhom, Luxol St Andrews FC Futsal waslu sal-finali wara rebħa impressjonanti ta’ 5-1 kontra University of Malta Students Futsal Team.
Għal Luxol, din il-finali tista’ tfisser aktar minn trofew ieħor. Rebħa nhar il-Ġimgħa tagħtihom it-tielet unur tal-istaġun u t-twettiq tat-treble, kisba li tkompli tikkonferma d-dominanza tagħhom fix-xena tal-futsal lokali.
Madankollu, quddiemhom se jkollhom tim żagħżugħ mimli enerġija, talent u determinazzjoni, li diġà wera li kapaċi jisfida lill-aqwa. Il-konfront bejn tim stabbilit u forza ġdida li qed tikber jagħmel din il-finali waħda mill-aktar mistennija tal-istaġun.