Fiorentina qed tikkunsidraw li jieħdu azzjoni legali kontra l-eks coach, Fabio Grosso, wara li keċċewh, bil-għan li jevitaw li jkomplu jħallsu s-salarju tiegħu.
Grosso tkeċċa tard il-Ħadd filgħaxija wara li Fiorentina tilfu l-ewwel tliet logħbiet tal-istaġun fis-Serie A. Huwa ġie sostitwit minn Paolo Vanoli, li kien diġà ħadem mal-club matul parti kbira mill-istaġun li għadda u għen biex jevita r-relegazzjoni wara bidu ħażin ieħor taħt Stefano Pioli.
Skont rapporti fil-media Taljana, l-avukati ta’ Fiorentina qed jeżaminaw il-possibbiltà li tittieħed azzjoni dixxiplinarja kontra Grosso. Il-club irid jipprova li t-tkeċċija tiegħu saret għal raġuni valida, sabiex ma jkollux għalfejn iħallsu s-salarju għall-bqija tal-kuntratt.
Huwa rrappurtat li Grosso qal lid-direttur Fabio Paratici li ma setax ikompli fil-kariga minħabba nuqqas ta’ qbil fundamentali dwar l-istrateġija tat-trasferimenti.
Minkejja dan, Grosso qatt ma ppreżenta r-riżenja tiegħu uffiċjalment. Kien hemm ukoll xnigħat li seta’ ma jmurx għax-xogħol fi Viola Park, iżda dan ma seħħx.
Issa Fiorentina qed jippruvaw jużaw dawn iċ-ċirkostanzi biex isaħħu l-każ tagħhom u jevitaw obbligi finanzjarji futuri lejn il-coach imkeċċi.
