Il-clubs tal-Premier League Ingliż nefqu aktar minn £1 biljun fi trasferimenti internazzjonali fl-2021, turi data ġdida ppubblikata mill-korp governattiv dinji tal-football, il-FIFA.
Sebgħa mill-10 ftehimiet l-aktar għaljin tas-sena kienu jinvolvu players li jmorru l-Ingilterra, bit-trasferiment ta’ Romelu Lukaku ta’ £97.5 miljuni ma’ Chelsea fuq quddiem tal-lista.
L-iffirmar ta’ Jadon Sancho ta’ £73 miljun għen biex jagħmel lil Manchester United l-aktar club li jonfoq f’din il-lista, qabel Chelsea.
Mill-20 club Ewropew li nefqu l-aktar fl-2021, 10 kienu mill-Ingilterra.
Manchester City kienu fit-tmien post fil-lista, għalkemm iċ-ċaqliqa ta’ £100 miljun ta’ Jack Grealish minn Aston Villa ma kinitx inkluża peress li dak kien trasferiment domestiku.
B’kollox, il-clubs Ingliżi nefqu £1.01 biljuni fuq trasferimenti internazzjonali. L-ogħla nefqa li jmiss ġiet minn clubs Taljani, li ħallsu £486 miljun, filwaqt li l-Istati Uniti kienet l-uniku nazzjon mhux Ewropew li għamel l-ewwel 10, b’infieq totali ta’ £116.39 miljuni.
Il-clubs Ingliżi rċevew aktar minn kwalunkwe pajjiż ieħor fi ħlasijiet ta’ trasferiment – £399.48 miljuni.
L-infieq totali fuq trasferimenti kien ta’ £3.54 biljuni – tnaqqis ta’ 13.6% mill-2020 u 33.8% taħt l-2019 ta’ qabel il-pandemija – għalkemm in-numru totali ta’ trasferimenti żdied minn 17,190 fl-2020 għal 18,068 fl-2021.
Għall-ewwel darba, intefqu aktar flus fuq players Franċiżi minn players minn kwalunkwe pajjiż ieħor.
L-aqwa 20 club fl-Ewropa li nefqu fuq il-miżati tat-trasferimenti internazzjonali fl-2021 huma:
1. Manchester United; 2. Chelsea; 3. RB Leipzig; 4. Roma; 5. Arsenal; 6. Tottenham; 7. Paris St-Germain; 8. Manchester City; 9. Bayer Leverkusen; 10. Milan; 11. Marseille; 12. Juventus; 13. Atletico Madrid; 14. Norwich City; 15. Brighton; 16. Villarreal; 17. Monaco; 18. Aston Villa; 19. Leicester; 20. Liverpool.