“Robert dejjem kellu sens qawwi ta’ ġustizzja. Li kulħadd għandu jkollu opportunità. Li kulħadd għandu jkun rispettat. Li kulħadd għandu jingħata sostenn”, Hekk bdiet biex tiddeskrivi lil żewġha, mart il-Prim Ministru Robert Abela.
Lydia Abela f’kumment ma’ Talk.mt qalitilna li temmen li dan joħroġ ħafna mill-ħidma tiegħu bħala Prim Ministru. Żiedet tgħidilna li “r-riformi li għamel fejn tidħol is- saltna ta’ dritt, r-riformi biex aktar nisa jkunu rappreżentati fil-parlament, il-bidliet fil-liġi tad-divorzju, fost l-oħrajn, kollha għandhom linja waħda.”
Is-Sinjura Abela qalet li din il-linja tinkludi li jitnaqsu t-tbatijiet, l-ingustizzji, li jingħataw ċansijiet ġodda. Qalet ukoll li bħala progressiv hu jemmen li jekk jingħata l-opportunitajiet u l-għoddod neċessarji kulħadd jirnexxi, u dik hija s-soċjetà li jrid jibni.
“Soċjetà aħjar għal uliedna”, tenniet is-Sinjura Abela.